LIGJET E BIZNESIT
Kryeministri Edi Rama gjatë një komunikimit me gazetarët për takimin që pati me Presidentin francez, Emanuel Macron tha se kishte diskutuar në “Elysee” për investimet e Agjencisë Franceze për Zhvillim si dhe për planin europian të investimeve për Ballkanin”.
“Agjencia Franceze për Zhvillim është angazhuar për financimin e tre projekteve të rëndësishme, ku projekti më i rëndësishëm është investimi për finalizimin e gjithë punës që duhet bërë për të përmbyllur investimet tërësore të bëra në ujësjellësin e qytetit të Durrësit dhe për të garantuar më në fund, edhe për Durrësin, 24 orë ujë pa ndërprerje, një angazhim që ja kërkova dhe Presidenti e mori pas tërmetit”, tha Rama.
Kryeministri shtoi se synohet të merret financim për disa projekte të rëndësishme me impakt kombëtar dhe rajonal në transport, në infrastrukturë dhe digjitalizim.
Por temë diskutimi ka qenë edhe situata në rajon ku vend kryesor zë procesi i dialogut midis Serbisë dhe Kosovës, për të cilën ai tha:
“Nuk jam njeriu i duhur për të ndërmjetësuar midis Kosovës dhe Serbisë, sepse unë jam palë. Dhe si palë, unë mbroj detyrimisht interesat e Shqipërisë dhe të Kosovës bashkë. Ky është një proces ku u takon udhëheqësve në Kosovë të çojnë përpara dialogun, ashtu siç ato e mendojnë të arsyeshme”, u shpreh Rama.
