U ekzekutua në Durrës/ Kush është 40-vjeçari që mbeti viktimë, anëtar i bandës së Lul Berishës

Mëngjesin e sotëm 40-vjeçari Edmond Koçi, i njohur ndryshe dhe si Mond Çekiçi, u ekzekutua në Durrës pas një atentati me armë zjarri.

Ngjarja e rëndë ndodhi rreth orës 08:40 në lagjen nr.16 të qytetit bregdetar.

Mësohet se viktima që u qëllua me armë pranë Drejtorisë Arsimore, është një nga anëtarët e bandës kriminale të Lul Berishës.

Nga raportimet bëhet me dije se Koci ka humbur jetën në vendin e ngjarjes.

Ai udhëtonte me makinë me shofer, në momentin që një tjetër mjet i ka prerë rrugën.

Sipas informacioneve drejtuesi i mjetit ku udhëtonte viktima ka dalë për të pyetur çfarë ka, ndërsa një nga personat në mjetin tjetër ka qëlluar për vdekje Edmondin.

Pak momente pas ngjarjes është raportuar se një mjet i ngjashëm me atë që dyshohet se është përdorur në atentat është gjetur duke u djegur në Sukth.

Policia ka nisur hetimet lidhur me ngjarjen, ndërsa janë ngritur postoblloqe në pikat hyrëse dhe dalëve të qytetit.

Viktima ishte ndaluar rreth 1 vit më parë nga policia e Durrësit për armëmbajtje pa leje.