Fajësuan njëri-tjetrin/ Dalin pamjet nga sherri, momenti kur kandidati i PD përleshet me biznesmenin Luca

Pamjet që shihni më poshtë tregojnë momentet kur kandidati për deputet i PD Luçiano Boçi dhe biznesmeni i njohur Gjergj Luca, nisin të përplasen me njëri-tjetrin.

Fillimisht ata afrohen dhe më pas tregojnë forcën. Por, në këto pamje nuk shihet asgjë më tepër nga skena e dhunshme që la me shenja ish-deputetin dhe biznesmenin.

Pas akuzave që i bëri Luca, Luçiano Boçi ka mohuar se i ka grabitur telefonin.

Ai shton gjithashtu se objekti në fjalë ishte i tij dhe se i ra në tokë pasi biznesmeni e goditi.

Kujtojmë se ngjarja ndodhi dje në mesditë në Labinot të Elbasanit.

Biznesmeni Luca ushtron aktivitetin prej vitesh tashmë në këtë zonë, ndërsa nga ana tjetër vetë Boçi ka shkuar për takim me banorët. Në një deklaratë që ka dhënë për mediat, Boçi tha se Luca e ka kërcënuar me jetë, duk e cilësuar këtë sulm me motive politike.

Vetë biznesmeni tha se Boçi e ka sharë dhe madje e ka provokuar. Sipas tij, Boçi e ka qëlluar teksa po futej në një lokal duke i marrë edhe telefonin. Në fjalën e tij, Luca kërkoi publikimin e pamjeve të sherrit, duke shtuar se ato do të vërtetojnë pafajësinë e tij.

Deri më tani Policia e Elbasanit ka shoqëruar tre persona, të cilët kanë qenë dëshmitarë gjatë përplasjes fizike.

Po ashtu bëhet e ditur se uniformat blu kanë sekuestruar pamjet e kamerat e lokalit, të cilat kanë filmuar gjithçka, dhe pritet që të zbardhen detaje në momentet në vijim.