Qeveria e re e Kosovës/ Ambasadori amerikan: Inkurajova Haradinajn dhe Hoxhajn të veprojnë me konstruktivitet

Ambasadori amerikan në Kosovë Philip Kosnett ka bërë me dije se ka takuar liderin e Aleancës për Ardhmërinë e Kosovës Ramush Haradinaj, si dhe ushtruesin e detyrës së kryetarit të Partisë Demokratike të Kosovës Kadri Veseli për t’i inkurajuar që të veprojnë me konstruktivitet në rolin e opozitës.

Kosnett zbuloi përmes një postimi në Twitter se u ka kërkuar atyre që, të punojnë së bashku me qeverinë në synimet e përbashkëta dhe të vendosin nevojat e qytetarëve mbi qëndrimet politike.

Më herët Hoxhaj ka thënë se: “Ju e dini që, a qëndron apo nuk qëndron në sallë, nuk ka kurrfarë vlere. Vlera është, a merr pjesë apo nuk merr pjesë në votim, dhe qëndrimi jonë është që kandidatura e zonjës Osmani është e papranueshme, nuk e reflekton vullnetin, më së paku të elektoratit të PDK-së, por nuk e reflekton edhe vullnetin e qytetarëve të Kosovës, meqë ka qenë një figurë më shumë polarizuese, përçarëse, në raport me qytetarët e Kosovës, por edhe në raport me ish-subjektin e saj politik, të cilin subjekt e ka shndërruar në viktimë në këto zgjedhje”.

Ndërsa Haradinaj, tha se partia që drejton ai, do të jetë pjesë e konstituimit të Kuvendit të Kosovës.

Më 22 mars është caktuar të mbahet seanca konstituive e legjislaturës së tetë të Kuvendit të Kosovës, ku pritet që 120 deputetët e rinj të bëjnë betimin dhe të zgjedhin kryetarin dhe pesë nënkryetarët e këtij institucioni.

Konstituimi i kuvendit i hap rrugë formimit të Qeverisë së re dhe zgjedhjes së presidentit të ri të Kosovës.