“Do të paguajë”/ Putin i përgjigjet Biden: I shari, të shan!

Lidhjet mes Moskës dhe Uashingtonit, kanë shënuar një rekord të ri të ulët.

Pasi një ditë më parë e quajti vrasës duke thënë “I shari të shan”, presidenti Rus Vladimir Putin, nuk e la pa përgjigje homologun amerikan Joe Biden.

“Unë i uroj atij shëndet. Po e them këtë pa ironi, nuk është një shaka. I shari të shan. Ka një domethënie të thellë psikologjike në gjithë këtë”, tha Putin.

Në një intervistë me ABC News, të mërkurën, Biden tha se Putin do të paguante çmimin për përpjekjet për të dëmtuar kandidaturën e tij në zgjedhjet e vitit të kaluar. I pyetur nëse mendonte se Putin ishte një vrasës, Biden u përgjigj: Po, kështu mendoj. Ai do të paguajë një çmim. Ne kemi folur gjatë me njëri tjetrin, dhe unë e njoh relativisht mirë atë. Dhe gjatë bisedës i thashë: E di që edhe ti më njeh mua. Nëse unë mësoj se kjo ka ndodhur, atëherë duhet të presësh pasojat.

Ajo që u vu re ishte se komentet e Biden ishin në kontrast të dukshëm me ato të paraardhësit të tij, Donald Trump, që shpesh është akuzuar se është shumë i butë me Rusinë.

Vitet e fundit, marrëdhënia e Rusisë me Uashingtonit është përkeqësuar gjithnjë e më shumë, ndërkohë që pati thirrje në Moskë të mërkurën që Rusia të ngrijë marrëdhëniet me SHBA pas komenteve të Biden.