“Drama më e madhe që po i ndodh vendit” Meta ngre alarmin dhe lëshon thirrjen e fortë

Pasditen e sotme presidenti Ilir Meta ka nxjerrë një raport të Komisionit Ekonomik për Europën në Kombet e Bashkuara, sipas të cilit Shqipëria kryeson listën për rritjen e emigracionit në proporcion me popullsinë.

Kreu i Shtetit e quan këtë si dramën më të madhe të vendit tonë dhe bën thirrje që të shumëfishohen përpjekjet e të gjithëve aktorëve për të ndalur fenomenin.

REAGIMI I PLOTE

Shpopullimi është drama më e madhe, që po i ndodh vendit.

Një tjetër raport, kësaj here i Komisionit Ekonomik për Europën në Kombet e Bashkuara, bën me dije se Shqipëria kryeson listën e vendeve, që kanë përjetuar rritjen më të madhe të emigracionit në vitin 2020, pavarësisht situatës së pandemisë.

Sipas këtyre konkluzioneve mesatarja e të larguarve në vitin 2020 ishte mbi 550 qytetarë për 100 mijë banorë, një tendencë dukshëm në rritje në krahasim me vitin 2015 kur treguesi ishte rreth 350 emigrantë për 100 mijë banorë.

Ndaj duhen shumëfishuar përpjekjet e të gjithë aktorëve jo vetëm për t’i thënë NDAL SHPOPULLIMIT, por për programe konkrete e realiste, që u krijojnë mundësi më të mira qytetarëve e sidomos të rinjve.

Të bëjmë gjithçka, që shqiponjat të qëndrojnë dhe të kthehen në folenë e tyre dhe Shqipëria të ngrihet lart, atje ku e meritojnë ëndrrat dhe sakrificat e shqiptarëve.