Përfundimtare/ Nuk ka prova të mjaftueshme për probleme nga vaksina AstraZeneca

OBSH tha se nuk ka asnjë provë që mund tw tregojw se vaksina kundër Covid-19 AstraZeneca shkakton mpiksje gjaku.

Deklarata u bw nga zëdhënësi i OBSH-së, Christian Lindmeier. Ai theksoi edhe njëherë se organizata do t’i analizojë këto incidente dhe se gjetjet do t’i komunikohen publikut.

“Sot, nuk ka asnjë provë që incidentet janë shkaktuar nga vaksina dhe është e rëndësishme që fushatat e vaksinimit të vazhdojnë, në mënyrë që të mund të shpëtojmë jetë nga virusi”, tha Lindmeier.

Organizata tha se është duke i rishikuar raportet se vaksina antiCovid ka shkaktuar probleme të tilla tek njerëzit që e kanë marrë.

Disa vende evropiane e kanë pezulluar përdorimin e saj. Dhjetëra njerëz të vaksinuar kanë raportuar probleme me mpiksjen e gjakut.

Pothuajse 17 milionë njerëz në Bashkimin Evropian si dhe në Mbretërinë e Bashkuar e kanë marrë këtë vaksinë, ndërsa më pak se 40 raste të mpiksjes së gjakut janë raportuar që nga java e kaluar, u shpreh AstraZeneca.

Agjencia Evropiane e Barnave, e cila gjithashtu po rishikon incidentet e mpiksjes së gjakut, ka thënë se vaksina mund të vazhdojë ende të administrohet.

Referuar kësaj agjencie, “përfitimet nga vaksina vazhdojnë t’i tejkalojnë rreziqet e saj”.