“Ja sa do shkojë paga minimale” Rama bën premtimin për mandatin e tretë, rritje dhe për mësuesit e mjekët

Vijon prezantimi nga kryeministri Edi Rama i programit të Partisë Socialiste për pagat, biznesin dhe taksat në lidhje me mandatin e tretë.

Sipas tij, në katër vitet e ardhshme, paga minimale do të rritet në 40 mijë lekë (të reja) dhe mesatarja 85 mijë lekë (të reja).

“Nga 1 janari 2022 taksa për pagën minimale 400 mijë lek do të hiqet”, deklaroi Rama gjatë fjalës së tij.

Kryeministri u ndal dhe te ata që opozita i quan si oligarkë të lidhur me të, dhe tha se gjatë qeverisjes së tij ata kanë paguar 460% më shumë taksa.

“A e dini sa kanë paguar 100 bizneste më të mëdha për shtetin, shoqërinë falë heqjes së taksës së sheshtë dhe vendosjes së taksës progresive?  460% më shumë nga sa paguan kur në qeveri ishin këta që duan të rikthehen me taksën e tyre të sheshtë.

Tani vjen dhëndri i Saliut dhe Ilirit, me qesen e Monikës dhe me rikthimin e taksës së sheshtë u premton dhe u falë 200 milion dollarë nga buxheti i shtetit”, shtoi Rama.

Po ashtu, Rama premtoi se paga e mësuesve në mandatin e tretë do të rritet edhe me 40%. “Në mandatin e tretë pagat e mësuesve do rriten edhe 40% më shumë. Edhe paga e mjekëve do rritet me 40%. 30 % do rriten pagat e punonjëseve të administratës publike”, shtoi ai.