“Të ndërhyhet menjëherë” Shefi i OKB ngre alarmin, tregon me çfarë mund të përballet njerëzimi

Sekretari i përgjithshëm i OKB Antonio Guterres ka ngritur alarmin së fundmi, duke u shprehur i shqetësuar se miliona njerëz në dhjetëra shtete po përballen me uri akute, kryesisht për shkak të konflikteve.

“Pa veprime të menjëhershme, miliona njerëz do të arrijnë në prag të urisë ekstreme dhe vdekjes”, tha ai në një takim të nivelit të lartë të Këshillit të Sigurimit.

Guterres deklaroi se mbi 30 milionë njerëz në dhjetëra vende janë “vetëm një hap larg” urisë. Derisa konfliktet nxisin pjesën më të madhe të urisë, “tronditjet klimatike dhe pandemia C OVID-19 po u shtojnë karburant flakëve”, tha Guterres.

Saheli, Sudani i Jugut, Jemeni dhe Afganistani janë ndër vendet dhe rajonet më të prekura. Guterres bëri thirrje për grumbullimin e 5.5 miliardë dollarëve fonde për të shmangur katastrofën.

Drejtori ekzekutiv i Programit Botëror të Ushqimit, David Beasley, tha se pandemia C OVID-19 dhe një pandemi urie mund ta rrisin numrin e njerëzve që “marshojnë drejt urisë” nga 135 milionë në 270 milionë. Ai e përshkroi kërcënimin si “zi buke me përmasa biblike”.