Prej 13 vitesh në kërkim/ Arrestohet në Elbasan 46-vjeçari i rrezikshëm, ja për çfarë ishte dënuar (EMRI)

Një shtetas shqiptar është arrestuar me qëllim ekstradimin në Itali 13 vite pasi gjykata në shtetin fqinj e kishte dënuar për dy vepra penale.

Mësohet se bëhet fjalë për Eduart (Artan) Haxhi, 46 vjeç, banues në Elbasan, i cili u vu në pranga nga specialistët për Hetimin e Narkotikëve dhe Trafiqeve të Paligjshme, në bashkëpunim me Forcën e Posaçme “Operacionale” në Drejtorinë Vendore e Policisë Elbasan dhe Interpol Tirana.

“Kapja dhe ndalimi i tij u bë pasi Gjykata e Apelit Torino, Itali, në datën 04.03.2008, e ka dënuar me 10 vjet e 4 muaj burgim, për veprat penale “Shfrytëzim prostitucioni” dhe “Shtyrje për prostitucion në rrethana rënduese”, parashikuar nga Kodi Penal italian”, njoftoi policia.

Veprimet e mëtejshme për këtë shtetas do të kryhen nga zyra e Interpolit Tiranë.