“Listat e kandidatëve të jenë të pastra” Borrel në konferencë krah Ramës, jep mesazhin e fuqishëm

Aktualisht po mbahet në Bruksel konferenca e përbashkët mes ministrit të Jashtëm të BE Joseph Borrel, Komisionerit për Zgjerimin Oliver Varhelyi dhe kryeministrit Edi Rama.

I pari që mbajti fjalim ishte Borrel, i cili u shpreh se Shqipëria është një partner kyç për Bashkimin Europian.

Gjithashtu politikani u bëri një apel dhe udhëheqësve të partive në Shqipëri, ku theksoi se duhet të vihen në lista kandidatë për deputetë me integritet, pasi ky është një parim për integrimin në BE.

“Së pari Shqipëria është një partner kyç për BE. Është një partner i besueshëm për sigurinë dhe një model, shembull për rajonin. Shqipëria në mënyrë konsistente është 100% në përputhshmëri të plotë me politikën e BE për çështjet e jashtme dhe të sigurisë.

Ju jeni një shembull në Ballkan dhe nuk mund ta themi për të gjitha vendet e Ballkanit Perëndimor. BE partneri më i fortë i Shqipërisë dhe do vazhdojmë t’iu qëndrojmë në krahë në rrugëtimin drejt BE.Këshilli i sotëm ishte një mundësi që ne të kuptonin se si dhe ku jemi në këtë marrëdhënien tonë dhe për zbatimin e reformave të nevojshme. Vazhdojmë ta inkurajojmë Shqipërinë që të vazhdojë me këto reforme por edhe për faktin se këto reforma janë kyçe për modernizimin e Shqipërisë dhe për të ardhmen e qytetarëve. Për zgjedhjet e 25 prillit theksojmë nevojën që të gjithë të bëjnë të pamundurën që listat e kandidatëve të kenë njerëz me integritet. Sa iu përket zgjedhjeve ne kemi dhe një mesazh për të gjitha udhëheqësit politikë dhe gjitha palët. Objektivi i integrimit duhet të jetë për të gjithë. Polarizimi i skajshëm nuk është shenjë e pjekurisë politike dhe nuk është në interesin e qytetarëve shqiptarë,” tha Borrell.