INSTAT publikon Indeksin e Çmimeve të Konsumit/ Inflacioni zbriti në 0.4 % në janar

Inflacioni, që mat ndryshimin vjetor të çmimit të mallrave, llogaritet 0.4 % gjatë muajit janar, ndërsa objektivi i shënjestruar i Bankës së Shqipërisë është 3 %.

INSTAT publikoi sot Indeksin e Çmimeve të Konsumit. Të dhënat e INSTAT tregojnë se rritja mesatare vjetore e çmimeve në janar ishte 0.4 % nga 1.5 % që ishte në janarin e vitit 2020.

Rritja vjetore e çmimeve në muajin janar është ndikuar kryesisht nga grupi “ushqime dhe pije joalkoolike” me 0,36 %, pasuar nga grupi “mobilie, pajisje shtëpie dhe mirëmbajtje e shtëpisë” me +0,13 %.

Çmimet e grupit “argëtim dhe kulturë” kanë kontribuar me +0,05 %. Çmimet e grupeve “pije alkoolike dhe duhan” dhe “hotele, kafene dhe restorante” kanë kontribuar me +0,04 %.

Çmimet e grupit “shëndeti” kanë kontribuar me +0,03 %, ndërsa të grupit “komunikimi” kanë kontribuar me +0,02. Ndikim negativ ka dhënë grupi “transporti” me 0,29 %, grupi “qira, ujë, lëndë djegëse dhe energji” me -0,02 % dhe grupi “veshje dhe këpucë” me -0,01 %./ATSH