LIGJET E BIZNESIT
Greqia kërkon zyrtarisht 65 mijë punëtorë sezonale, kryesisht për punët në bujqësi e blegëtori. Kryesuesit e listës së preferimeve janë padyshim shqiptarët.
Për gati 30 vite, shtetasit shqiptarë kanë qenë grupi më i madh i emigrantëve në Greqi. Edhe në kohë karantine, shteti fqinj kërkoi afro 10 mijë të punëtorë pasi të mbjellat e tyre nuk kishte kush t’i mblidhte. Edhe këtë herë, jo me shumë ndryshim nga hera e kaluar, është publikuar në fletoren zyrtare vendimi për lejet e qëndrimit që do t’u jepen punëtorëve të sektorit të bujqësisë dhe blegtorisë në Greqi.
Për herë të parë qeveria greke ka vendosur që përveç punëtorëve qe marrin leje qëndrimi çdo vit në Greqi në bazë të ligjeve në fuqi, të vendosë edhe kuotat e punonjësve sezonalë që do të kenë të drejtë të punësohen në çdo prefekturë. Më konkretisht 65.000 në bujqësi dhe rreth 10.000 në blegtori, me leje të përkohshme qëndrimi sezonale si dhe 18.000 vende të reja në bujqësi si dhe 10.000 të tjera në blegtori, me leje qëndrimi të përhershme.
Tashmë lejet zyrtare të qëndrimit që parashikohen edhe për punëtorët sezonalë, japin mundësinë për qendrim të ligjshëm të përkohshëm në Greqi, çka më parë ka qenë e pamundur. Vendimi i ri i qeverisë greke, shënon një etapë tjetër në këtë proçes, duke zyrtarizuar tashmë statusin e tyre dhe duke krijuar vende konkrete pune. Vendin e parë për krahë pune e mban prefektura e Imathisë me 12.000 leje pune, e ndjekur nga Halkidhikia me 10.000 dhe Pela me rreth 7000 leje.
I rëndësishëm është fakti që pala greke dëshiron ta zyrtarizojë këtë bashkëpunim kryesisht me Shqipërinë prej nga ku është fluksi më i madh i kërkesave. Kjo jo vetëm prej afërsisë mes dy vendeve, por edhe për faktin se shqiptarët konsiderohen si punonjës të specializuar në sektorin e bujqësisë.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
