“Mënyra se si i kalojmë ditët tona, është natyrisht mënyra se si e kalojmë jetën tonë”- shkruan Eni Dilard në librin e saj “Jeta e shkruar”.S’ka asnjë formulë magjike për një jetë të kënaqshme, por ka gjëra të thjeshta për të bërë që mund të na çojnë në atë drejtim.
“Ne mund të zgjedhim atë mbi të cilën duam të përqendrohemi në jetën tonë, sjelljet tona, mendimet tona, dhe madje të zgjedhim edhe llojin e personit që duam të jemi në jetë”-thotë Erik Zimer, drejtuesi i podcastit “The One You Feed”.
Zimer bisedoi me gati 200 psikologë, mësues dhe këshilltarë për jetën, për të kuptuar se si ta kapërcejmë frikën dhe të gjejmë lumturinë. Ai zbuloi se duhet më shumë se sa “të menduarit pozitiv”. Për të pasur jetën më të mirë të mundshme, ju duhet një përpjekje e vazhdueshme për të bërë një jetë më të mirë. Ja disa strategji të thjeshta për të filluar që sot ndryshimin:
1. Meditoni
“Edhe nëse është vetëm 2-3 në ditë, meditimi i përditshëm të ndihmon të jesh më i pranishëm, i përqendruar dhe më i ndjeshëm”- thotë Zimer. Gjithashtu meditimi mund t’ju ndihmojë të kuptoni se si funksionon mendja juaj dhe të shmangni “autopilotin” mendor.
“Lumturia bazohet në aftësinë për të qenë i vëmendshëm. Është shumë e rëndësishme të filloni stërvitjen e kësaj aftësie”- shprehet ai.
Nëse je fillestar në këtë fushë, atëherë fillojeni duke u ulur në një hapësirë të qetë për disa minuta në të njëjtën kohë çdo ditë. Kushtojini vëmendje vetëm asaj që po ndodh në momentin aktual, duke u përqendruar tek frymëmarrja tuaj.
Kur ju vjen një mendim, përqendrohuni sërish vetëm tek frymëmarrja juaj. Të ulurit enkas për të medituar, nuk është mënyra e vetme për të qenë i vëmendshëm. Zimer rekomandon që ju mund të provoni aktivitete të tjera si vrapimi apo pastrimi i shtëpisë për sa kohë që e trajnoni veten të jeni në momentin aktual.
2. Vendosni një kohëmatës në telefonin tuaj, për të shmangur lundrimin në internet për një kohë shumë të gjatë
Burimet e informacionit në Twitter, Facebook dhe Tumblr, janë bërë enkas për të na inkurajuar që të lëvizim lart e poshtë nëpër këto faqe. Edhe riprodhimi automatik i videove nëYouTube dhe Netflix janë tipare që na inkurajojnë të shohim një mori videosh.
“Ne kemi një dëshirë shumë të natyrshme që të shfokusojmë vëmendjen përmes telefonave tanë, gjë që nuk është gjithmonë e keqe në vetvete. Por duhet të konsumojmë diçka për të cilën jemi të apasionuar. Sa më shumë të jemi të ndërgjegjshëm se si e kalojmë kohën tonë dhe nëse bëjmë atë që është e rëndësishme për ne, aq më të kënaqur do të jemi”-thotë Zimer.
Në fakt,ne mund të përdorim telefonat tanë për të shmangur përdorimin e internetit në një mënyrë që na lodh tej mase. Nëse dëshironi të përdorni Facebook vetëm për 10 minuta, vendosni një kohëmatës. Në fund të 10 minutave, shkëputuni menjëherë. Gjithashtu, ju mund t’i bëni vetes këto 3 pyetje disa herë në ditë:Ku jam?Çfarë po bëj?A është e rëndësishme për mua?
3. Luani për të dëbuar mendimet negative
Nëse vëreni se keni shumë mendime negative, Zimer ju rekomandon që të provoni lojën e alfabetit. Fillojeni me shkronjën A dhe emërtoni diçka që ju pëlqen dhe që fillon me këtë shkronjë. Vazhdoni me B dhe kështu me radhë derisa të arrini tek shkronja e fundit.
“Është një strategji e shkëlqyer për të larguar idetë e gabuara nga mendja juaj. Ndryshoni mendjen tuaj, dhe kjo mund të jetë më efektive sesa mendimet pozitive. Aspekti reflektiv i lojës ndihmon që kënaqësia të mbetet e gdhendur në shpirtin tuaj”-thotë ai. / Inc. – Bota.al
