Kryeministri Edi Rama ka njoftuar mbrëmjen e sotme se dozat e vaksinës “Pfizer” kanë mbërritur në Shqipëri, ashtu siç ishte thënë dhe më herët.

Në një konferencë për shtyp nga Rinasi, ai deklaroi se vendi ynë nuk do të varet as te “Pfizer”, as nga “Covax” dhe as nga BE, por po shikon të gjitha mundësitë për të siguruar sa më shumë doza vaksinash.

Rama njoftoi se kanë ardhur 11.710 doza të vaksinës “Pfizer”, ndërsa pjesa tjetër prej 41 mijë do të mbërrijë deri në fund të shkurtit.

“Brenda muajit shkurt do të vijnë edhe dozat e angazhuara, 41 mijë dozat e parashikuara në fund të janarit dhe në shkurt. Nëse do të ketë përsëri ndryshime do iu njoftojmë. Në momentin që kemi radhën për të marrë dozat e tjera do priten me transparencë. Ne do të hyjmë në proces edhe për ata që janë moshat më të thyera, sipas planit të Ministrisë.

Jemi shumë afër kontratës me AstraZeneca. Nuk dua të jap detaje, sepse mund të ndryshojnë, jo për shkakun tonë natyrisht. Jemi optimist . Duam të realizojmë skenarin e parë, vaksinimi i të gjithë atyre që kanë dëshirë të vaksinohen brenda 14 muajve. Ky afat qëndron akoma. Me Pfizerin kemi diskuturar dhe për muajt e ardshëm, ama nuk e kemi varur veten në duart e Pfizer, Covax-it apo BE-se. Ka dhe vaksina të tjera rrugës që pritet të aprovohen,” tha Rama.