LIGJET E BIZNESIT
Një denoncim i fortë ka ardhur nga rradhët e demokratëve në qytetin e Durrësit. Kryetari PD-së në qytetin bregdetar, Ferdinand Xhaferraj, në një deklaratë për mediat ka thënë se varrezat e Durrësit do të jepen me konceision.
Ky shërbim, sipas Xhaferraj do monopolizohet nga kryetari i PS-së në këtë qytet, me vlerën e çmendur prej 376 milion lekë. Demokratët pretendojnë po ashtu se i njëjti projekt është tenderuar me një shifër më të ulët në vitin 2019, ndërsa sot qytetarët durrësakë duhet të nxjerrin më shumë para nga xhepat për të mbuluar këto kosto.
‘Varrezat e qytetit të Durrësit janë në gjendje të mjerueshme, megjithëse fondi i Bashkisë së Durrësit është rreth 300 milionë lekë në vit për mirëmbajtjen. Gjendja është kjo, se askush nuk punon për të shërbyer, por për të abuzuar. Përpara 2 ditësh ka ndodhur e paimagjinueshmja. Këshilli bashkiak është mbledhur dhe ka vendosur te japë me koncesion shërbimin funeral. Të privatizojnë, të japin me koncesion varrezat. Vendimi është shumë tinëzar për mënyrë sesi është hartuar.
Që në kokë, relacioni i referohet një vendimi të vitit 2019, për 88 milionë lekë të vjetra, por në të vërtetë ajo që jepet me koncesion shpjegohet më poshtë, janë 376 milionë lekë, një grabitje e pastër, një taksë e re që u shtohet qytetarëve të Bashkisë së Durrësit. Në prag të ikjes kanë shkuar përtej. Në të gjitha burimet që kam brenda bashkisë, këtë koncension e fiton Luan Zaza, kreu i Partisë Socialiste Durrës.
Nuk paskan të ngopur në grabitjen që i bëjnë qytetarëve të Durrësit. Këto janë nga ato rastet e shumta ku përplaset dhunshëm në fytyrë makutëria e kësaj qeverie për të grabitur qytetarët. Është një nga ato skandale që e bëjnë akoma më të domosdoshme pjesëmarrjen masive në 25 Prill për ta larguar këtë bandë”- ka thënë Xhaferraj.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
