“O Zot a kanë tru apo jo?” Fuga bën reagimin e fortë për pandeminë: Historia do vazhdojë nëse nuk merren masa

Situata e pandemisë në vendin tonë vijon të jetë shqetësuese.

Këtë e treguan dhe të dhënat e ministrisë së Shëndetësisë sot, ku në njoftimin e përditshëm u tha se në 24 orët e fundit kanë rezultuar pozitive 586 qytetarë.

Gjithashtu u bë me dije se 6 qytetarë të moshës 54-88 vjeç kanë humbur jetën, duke e çuar në 1287 numrin total të viktimave që nga fillimi i pandemisë.

Ndërkohë pas publikimit të shifrave, akademiku Artan Fuga shprehet se nuk dihet sesa persona e kanë humbur jetën nëpër shtëpi.

“Gjashtë nga ne së paku humbën jetën edhe sot, nuk dihet sa e kanë humbur nëpër shtëpira!

Kush vdes dhe kush infektohet mban përgjegjësi sepse deklarimi për krijimin e imunizimit të tufës ka vërtetuar se epidemia po zhduket vetiu.

Dhe nuk e ka keq, ka zbuluar një tautologji absurde, pasi të sëmuremi dhe të vdesim të gjithë, nuk ka kush të sëmuret dhe të vdesi më kush!

Deri në sezonin e ri, kur pandemia ta nisi edhe njëherë nga e para edhe nja dy vjet të tjerë.

Sa shërohen edhe po aq humbin imunitetin nga antitrupat dhe historia do të vazhdojë, nëse nuk merren masa, deri në çfarosjen tonë të plotë!

O Zot a kanë tru apo jo?” shkruan Artan Fuga.