Do betohet më 20 janar/ Zbulohen vendimet e para që Joe Biden do të marrë

Joe Biden do të betohet më datë 20 Janar si President i SHBA, pas zgjedhjeve që fitoi përballë rivalit të tij Donald Trump.

Ndërkohë kanë dalë dhe vendimet e para që demokrati do të marrë.

Në listë janë disa, por ditën e parë Biden pritet që të firmosë kthimin e Shteteve të Bashkuara në marrëveshjen e Parisit për klimën.

Gjithashtu pritet që të hiqet ndalimi i hyrjes në territorin amerikan për qytetarët e shumë vendeve, shumica e tyre myslimane. Vendosja e këtij ndalimi ishte një nga vendimet e para të Donald Trump pas marrjes së detyrës në janar 2017.

Shefi i ri i stafit të Biden tha se dekretet e para të Presidentit të ri do të adresonin katër përparësitë e Biden, duke trajtuar krizën shëndetësore, ndryshimin e klimës, rimëkëmbjen ekonomike dhe luftën për drejtësi sociale dhe racore.

Presidenti i ri pritet që të lëshojë një seri dekretesh gjatë ditëve të para. “Këto masa do të lehtësojnë miliona amerikanë që vuajnë nga këto kriza. Presidenti i sapozgjedhur Biden do të veprojë, jo vetëm për të korrigjuar dëmin serioz të qeverisë Trump, por gjithashtu për të lejuar që vendi të ecë përpara” tha shefi i stafit të tij, Ron Klein.