Sot nis vaksina/ Dalin emrat: Ja kush janë mjekët që do të marrin të parët injeksionin

Sot në orën 15:00 nis procesi i vaksinimi anti- C OVID19 në Shqipëri.

Lajmin e ka bërë të ditur kryeministri Edi Rama në një konferencë me gazetarët.

Ai ishte i pranishëm së bashku me ministren e Shëndetësisë Ogerta Manastirliu, në qendrën e parë të vaksinimit që është “Air Albania”.

Kreu i qeverisë zbuloi se do të jetë shefja e spitalit C OVID1, Najada Çomo e cila do të vaksinohet e para kundër virusit, ndërsa radhën do e pasojë mjeku Pëllumb Pipero dhe ai vetë, por nuk e ndau qartazi se cili nga të dy do vaksinohet i dyti, duke thënë se “do e gjejmë radhën atje me njëri-tjetrin”.

Rama sqaroi se janë 900 doza të dhuruara tashmë në Shqipëri, ndërsa u sigurua të thoshte se janë 975 doza në total, të cilat janë dhënë nga një vend mik i Bashkimit Evropian, por nuk e rrëfeu atë. Rama mohoi që ky vend të ishte Greqia, ndërsa nuk tha as nëse ishte Turqia. Dozat e para të vaksinës janë Pfizer/BioNtech.

Ndërkohë që ministrja e Shëndetësisë sqaroi strategjinë e vaksinimit, ku të parët do të jenë mjekët e spitaleve COVID19 dhe infermierët. Ajo u shpreh se “brenda disa muajve do të mbyllim procesin e vaksinimit të kategorive të rrezikuara”, por nuk dha afate për kohën e nevojshme.