Rrëshqitje dherash/ Shtylla e korentit rrezikon jetën e banorëve, si paraqitet situata në Durrës

Rrjeti i kanalizimeve ka arritur të përballojë sasinë e madhe të reshjeve të shiut gjatë mbrëmjes së djeshme në disa prej pikave kyçe të qytetit të Durrësit, akset kryesore dhe rrugët lidhëse të zonave periferike me ato kryesore, e megjithatë problematike mbetet zona e Shkozetit.

Pavarësisht se nën “pushtetin” e ujit janë më së shumti tokat e pabanuara, problematike është situata përsa i përket gropave të mbushura me ujë që ndodhen në rrugë.

Nuk është kjo hera e parë që kjo zonë e Durrësit sheh përmbytje, apo pellgje plot ujë dhe nuk është hera e parë as që thirrjet për ndihmë të banorëve shkojnë në vesh të shurdhët, sepse kjo situatë është e zakonshme prej 20 vitesh tashmë. Ndërkohë disa banorë shihen duke larguar ujin nga kati i parë i shtëpive të tyre, ndërsa niveli i tij ka shkuar në disa centimetra.

Rruga e Currilave, një prej zonave më të frekuentuara për qytetarët e zonës apo edhe për personat që zgjedhin Durrësin për të kaluar fundjavën, ka një pamje të mjerueshme nga balta e madhe në dy anët e rrugës.

Problematike shfaqet edhe situata në lagjen nr.2 në Kodër-Vilë pasi rrëshqitja e dheut ka dëmtuar një shtyllë elektrike dhe kjo e fundit është në rrezik rënieje. Banorët e zonës shprehen se kohë më parë i kanë kërkuar bashkisë Durrës të bëjnë një bllok betoni përreth shtyllës e megjithatë përgjigjja që kanë marrë ka qenë që bashkia nuk e shihte si një problem të mundshëm. Mirëpo ditën e sotme, ajo që bashkia e shihte si diçka pa rrezik, rrezikon jetën e dhjetra familjeve që jetojnë poshtë shtyllës.

Fatmirësisht situata është stabilizuar në lagjen “Erzeni” pasi lumi Erzen doli nga shtrati pasditen e djeshme dhe gjatë mbrëmjes e përmbyti totalisht lagjen “Erzeni” në Shijak. Mirëpo, ditën e sotme uji është tërhequr, një situatë kjo e ndihmuar edhe nga mungesa e reshjeve gjatë paradites së sotme./faxweb