“Nata do të jetë e vështirë” Paralajmëron Braçe pas reshjeve të dendura: Shpresojmë të mbajmë nën kontroll situatën

Pas reshjeve të dendura të shiut që kanë pushtuar vendin, zv.kryeministri Erion Braçe ka folur në lidhje me situatën.

Ai ka paralajmëruar se nata e sotme do të jetë e vështirë pasi parashikohet që reshjet masive të vijojnë.

Në fjalën e tij gjatë Konferencës Ndërministrore të Emergjencave Civile, Braçe tha se janë në gatishmëri dhe shpresojnë që ta mabjnë situatën nën kontroll.

“Nata e sotme do të jetë e vështirë. Do doja t’ju thoja që gatishmëria në hidrovore është 24/24 prej disa ditësh. Natyrisht që akoma më shumë njerëz do të shtohen nesër e në vijim për 2 ditët e ardhshme që janë paralajmëruar për reshje masive dhe shpresojmë që situatën ta mbajmë nën kontroll.

Unë besoj që secili nga kolegët ministra mund të japë informacion më të detajuar. Edhe kryepleqtë kanë njoftuar për situatën dhe kjo është arsyeja përse nuk kemi asnjë të rrezikuar nga prurjet e lumenjve. Komunikimet e vazhdueshme deri tek kryeplaku tek zonat e riskut që do të vazhdojnë edhe për këto ditë të vështira nga reshjet e shiut dhe më pas do të punojmë për të rikuperuar cdo dëm, sidomos në infrastruktura në të gjithë terriotirn e vendit.”, deklaroi zv.kryeministri gjatë fjalës së tij.