“Prej disa muajsh punoj nën presion” Revoltohet mjeku i urgjencës: Nga turni i natës në zyrat e Rilindjes

Mjeku i Urgjencës Kombëtare Ilir Allkja ka bërë së fundmi një deklaratë të fortë.

Ai denoncon presionet karshi tij dhe akuzon direkt drejtuesit e QSUT, të cilët sipas tij kërkojnë ta largojnë nga puna për shkak të deklaratave në media.

Me anë të një reagimi në rrjetet sociale, Allkja shkruan se ka qenë mbrëmë 12 orë në punë dhe nuk e quan heroizëm këtë gjë, por se sot në mënyrë të përsëritur është thirrur në drejtori ‘për rishikimin e marrëdhënieve të punë’.

Ai shton gjithashtu se ka qenë shpesh një zë i fortë në situatën e pandemisë, por edhe më herët duke denoncuar problematika të ndryshme të sistemit shëndetësor.

“Nga turni i natës në zyrat e rilindjes!

Mbrëmë isha 12 orë në punë.
Nuk them asnjëherë se bëj heroizma, thjesht punoj në shërbim të njerëzve, dhe për këtë paguhem.
Nuk e fsheh prej disa muajsh punoj nën presion.
Sot në mënyrë të përsëritur u thirra në drejtori, madje kësaj radhe “… për rishikimin e marrëdhënieve të punës” dhe fillimi e mbarimi i bisedës ishte fjala ime në media.
Unë ritheksoj se do të jetoj si qytetar i lirë, i angazhuar në jetën social-politike dhe do të jem i përkushtuar ndaj profesionit e punës!”, shkruan Allkja teksa publikon dhe njoftimin që ka marrë.