LIGJET E BIZNESIT
Pas protestave që u zhvilluan për shtatë ditë me rradhë për ekzekutimin e Klodian Rashës nga një efektiv policie, ka reaguar për herë të parë dhe drejtori i Policisë së Shtetit Ardi Veliu.
Ai ka thënë se efektivët kanë përballuar me sukses sfida të rëndësishme.
Gjatë aktivitetit të prezantimit të anketimit të qeverisë suedeze mbi perceptimin e publikut për Policinë e Shtetit, Ardi Veliu u shpreh se rezultatet e vendimeve të policisë janë më pozitive se në vitin 2018 pasi efektivët kanë qenë në përballje me protesta, manifestime, pandemi dhe sezon turistik prej 2 vitesh.
“Policia e shtetit i ka kushtuar rëndësi policimit në komunitet. Zyrat e pritjes së qytetarëve janë rikonstruktuar nga e para ose janë ribërë. Në mënyrë të vazhdueshme janë nxjerrë shqetësimet e publikut për kriminalitetin dhe është punuar shumë.
Të gjitha këto kanë sjellë, që 80% e të anketuarve janë shprehur se ndihen të sigurt në zonat ku banojnë. Krahasuar me 2013 vrasjet me dashje kanë ardhur në rënie të vazhdueshme, gjithashtu vjedhjet me pasojë vdekjen kanë rënë, po ashtu vjedhjet me armë, vjedhjet e banesave po ashtu kanë rënë. Është rritur edhe fuqia zbuluese.
Veprat penale të shkeljes së rregullave të qarkullimit po ashtu kanë rënë. Vitet 2018-19-20 kanë qenë me sfida si me protestat, manifestimet, pandeminë dhe sezonin turistik. Policia e Shtetit ia doli duke u përballuar me sukses me këto sfida. Vlerësimi i qytetarëve për sjelljen e policisë ka ardhur në vlerësim të vazhdueshëm. Rezultatet janë më pozitive se në 2018 për shpjegimin e vendimeve që policia merr”, u shpreh ai.
