LIGJET E BIZNESIT
Industria fason kërkon nga qeveria faljen e gjobave dhe kamatvonesave për gjithë periudhën e pandemisë. Shoqata “Pro Eksport Albania” i ka dërguar një letër ministres së Financave, Anila Denaj dhe ministrit për Mbrojtjen e Sipërmarjes, Eduart Shalsi, në të cilën parashtron shqetësimin se Drejtoritë Rajonale të Tatimeve, Doganat, OSSHE dhe Drejtoritë e taksave vendore te Bashkive, po mbledhin gjobat dhe interesat e sistemit të gjeneruara nga Marsi 2020, pra në Periudhën e Pandemisë. Industria fason vlerëson se ky është një veprim absurd, që nuk po ndodh në asnjë vend tjetër, pasi biznesi nuk është në situatë normale.
“Gjykojmë se është veprim krejtësisht i pavend, që në kohë lufte, të sillemi si në një periudhë normale me sipërmarrjet e vendit, të cilat po kalojnë periudhën më të vështirë që nga marsi i vitit 1997 dhe janë në përpjekje për mbijetesë”, theksohet në letër.
Shoqata Pro Eksport Albania kërkon që të lihet një hapësirë kohore, mbas përfundimit të gjendjes së jashtëzakonshme të pandemisë, që bizneset të rimarrin aktivitetin në pikën ku ishin. në këtë kushte, fasonët kërkojnë faljen e gjobave dhe kamatvonesave, si dhe mos kryerjen e kontrolleve të thelluara pranë sipërmarrjeve deri në mbarimin e pandemisë.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
