Ishin dënuar më parë/ Arrestohen 2 persona në Durrës, ja momenti kur policia i vë prangat pas asaj që zbuloi

Policia e Durrësit ka arrestuar dy persona të dënuar më parë, në kuadër të operacionit të koduar “Telekomanda”.

Gjatë këtij aksioni është goditur një rast i trafikimit të armëve të zjarrit dhe municionit luftarak jashtë vendit, me qëllim përfitimin e vlerave monetare.

Sipas njoftimit zyrtar të uniformave blu operacioni u zhvillua nga Seksioni për Hetimin e Narkotikëve në DVP Durrës, në bashkëpunim me Drejtorinë e Forcës së Posaçme Operacionale në Drejtorinë e Përgjithshme të Policisë, nën drejtimin e Prokurorisë së Rrethit Gjyqësor Durrës.

Si rezultat u bë arrestimi në flagrancë i shtetasve:

1. A.P., 47 vjeç,banues në Kuçovë, i dënuar më parë për veprën penale “Kultivim i bimëve narkotike”;
2. B.H., 60 vjeç,banues në fshatin Magjat, Kuçovë, i dënuar më parë për falsifikim.

“Arrestimi i tyre u bë pas një pune disamujore me metoda speciale të hetimit, ku si rezultat u dokumentua aktiviteti i tyre kriminal i trafikimit të armëve të zjarrit dhe municionit luftarak jashtë vendit, me qëllim përfitimin e vlerave monetare”, njofton Policia.

Në cilësinë e provës materiale shërbimet e Policisë sekuestruan 2 armë zjarri (mitraloz dhe kallashnikov), 822 fishekë, një sasi lënde narkotike cannabis sativa, 2 mjete në pronësi të shtetasve B. H. dhe A. P., si dhe 3 aparate celular, të cilët këta shtetas i kishin në përdorim.

Vijon puna për identifikimin e personave të tjerë të përfshirë në këtë aktivitet kriminal.

Materialet i kaluan Prokurorisë së Rrethit Gjyqësor Durrës, për veprat penale “Trafikimi i armëve dhe i municioneve” dhe “Prodhim dhe shitja e narkotikëve” kryer në bashkëpunim.