Jo vetëm Turqinë/ Tërmeti ‘shkund’ dhe ishujt në Greqi, ka persona të plagosur

Pas tërmetit të fuqishëm që goditi sot zonën mes Greqisë dhe Turqisë, të paktën katër persona kanë mbetur të plagosur në ishullin helen Samos.

Sipas Nikos Stefanis, presidenti i Spitalit Samos, të katër lëndimet ishin të lehta dhe individet në fjalë kishin probleme ortopedike.

Ai shtoi ndër të tjera se kishte dëme në ndërtesa dhe në të gjithë ishullin, kryesisht në zonën e Karlovasi, në veriperëndim të Samosit.

Duke përshkruar lëkundjen e tërmetit, Stefanis tha se ishte shumë i fortë dhe zgjati shumë në kohë.

Nga ana tjetër nënkryetari i Bashkisë së Samos Giorgos Dionisiou i tha medias Greke se ndërtesat e shembura ishin kryesisht ato të vjetra.

Shërbimi Zjarrfikës Grek në një deklaratë tha se deri më tani ishin raportuar vetëm dëmtime në ndërtesa. Ai tha se nuk kishte pasur thirrje për njerëz të bllokuar.

Autoritetet greke u thanë njerëzve të Samos që të qëndrojnë larg brigjeve dhe ndërtesave të ishullit.

Banorëve gjithashtu u është kërkuar të evakuojnë shtëpitë e tyre për 48 orët e ardhshme për arsye paraprake.

Instituti Gjeodinamik i Greqisë tha se epiqendra ishte në det 19 kilometra në veri të ishullit të Samos.