Kryetari i Bashkisë Tiranë Erion Veliaj, i cili është njëkohësisht dhe drejtues politik i PS për kryeqytetin, ka vijuar fushatën elektorale të zgjedhjeve të 25 prillit.
Ndërkohë ai ka vendosur të përdorë gjatë kësaj periudhe jo pak emra të njohur të ekranit.
Kujtojmë se dje Veliaj prezantoi Valbona Selimllarin, aktualisht këshilltare e tij, si një mbështetje e re për Partinë Socialiste.
Ndërsa ditën e sotme doli aktori Gazmend Paja, anëtar i PS në këshillin bashkiak të Tiranës, si mbështetës i kësaj force politike.
Ai ishte i pranishëm në Farkë gjatë një takimi të Veliajt me socialistët.
“Dikush më pyeti dhe më tha se përse iu bashkove Erion Veliajt dhe shokëve të vet.
Në fakt Jo, këta më janë bashkuar mua. Sepse unë dua një vend më të mirë, siguri më të madhe, dua të kem një vend të qetë ku të rris djalin tim.
Kështu pra, kur vendosa që të kandidoj për Këshillin Bashkiak të Tiranës, mendoj që kam bërë një zgjedhje shumë të mirë, sepse më besoni, nuk ka ndjesi më të bukur se sa të kontribuosh konkretisht për transformimin e qytetit tënd.
Unë jam njeri i punës, e besoj këtë dhe punoj fort.
Ndaj duke besuar këtë e mbështes lali Erin bashkë me shokët e vet. Kam fatin ta njoh edhe nga afër se sa fort punon ai”, tha Paja.