Vijon procesi i Vettingut në drejtësi.
Mësohet se Alket Mersini, me detyrë Prokuror në Prokurorinë pranë Gjykatës së Rrethit Gjyqësor Tiranë është shkarkuar nga detyra.
Vendimi u mor në Komisionin e Pavarur të Kualifikimit, pas dyshimeve për burimet financiare për 2 apartamente dhe një vlerë 40 mijë euro që një kompani ndërtuese kishte depozituar në llogarinë bankare të bashkëshortes së tij.
Së fundi Mersini ishte një nga prokurorët që po hetonte lidhur me dëmet që la pas tërmeti i 26 Nëntorit të vitit të kaluar në Tiranë.
Alket Mersini e ka filluar karrierën në sistemin e drejtësisë në vitin 1999 dhe përgjatë dy dekadave ka punuar si prokuror në Prokurorinë e Durrësit dhe atë të Tiranës.
Relatorja Pamela Qirko tha në fillim të seancës dëgjimore se hetimi administrativ për prokurorin Mersini ishte përfunduar në të tri kriteret, atë të pasurisë, pastërtisë së figurës dhe profesionalizmit.
Analiza e Komisionit është shtrirë mbi burimet financiare të deklaruara për blerjen dy apartamenteve, një të porositur në vitin 2003 në qytetin e Elbasanit dhe tjetrin në vitin 2011 në Tiranë.