Një vit i ri shkollor që pritet të nisë me risi këtë vit dhe jo nga Covid 19, por nga një plagë që duket se më në fund po lihet pas. Për herë të parë pas 30 vitesh, fëmijët e ngujuar nga gjakmarrja nuk do të mungojnë në bankat e shkollës.
Rreth 70 fëmijë të moshave të ndryshme që numërohen në qarkun Shkoder si të prekur nga ky fenomen, do të jenë të lirë të shkojnë në shkollat e zonës ku banojnë, pa u penguar apo pa ju rr.ezikuar jeta nga familja e gj.aksit. Lajmin e konfirmon kreu i misionareve të pajtimit të gjaqeve Nikoll Shullani, i cili thotë se falë edhe negociatave që janë bërë por edhe njëlloj ndërgjegjësimi të fituar, për këto fëmijë nuk do të ketë pengesa që të ndjekin shkollën.
Fenomeni i cili ndër vite ka shënuar jo pak plagë në vendin tonë, edhe sot pas 3 dekadash nuk ka marrë ende një zgjidhje përfundimtare dhe shteti nuk ka arritur ta mbyllë megjithë paralajmërimet e dhëna. Të shumta janë jetët e humbura nga gjakmarrja, e po ashtu familjet që u duhet të vuajnë pasojat e fenomenit, me ngujim në shtëpi dhe pamundësi për të lëvizur.
Mes tyre edhe moshat e vogla, ku shpesh është apeluar që së paku për ta të kishte lehtësi. E me sa duket këto lehtësi janë arritur të gjenden vetëm këtë vit, ku natyrshëm numri ka rënë shumë më shumë sesa deri përpara pak vitesh, kjo për shkak të largimeve masive në vendet e Europës, atje ku të shumta janë familjet në gjak që kanë kërkuar mbrojtje. Atë mbrojtje që shteti ynë nuk ja garantoi, e për fat të keq edhe sot vijon të mos ju a ofrojë sa dhe si duhet.
Në rrethanat kur ka shumë paqartësi, megjithatë janë disa familje që megjithëse nuk kanë pengesa për të derguar fëmijet në shkollë nga gjaksi, janë të vendosura të mos i lëjojnë të shkojnë pasi frika bashkëjeton me to. Frikë që ka lindur edhe për shkak të pandemise Covid 19 dhe paqartësive të tjera, që për to në kushtet e një varfërie ekstreme, bëhet edhe më e madhe. Zyrtarisht ministria e arsimit nuk ka thënë asnjë gjysëm fjalë për këtë fenomen dhe fatin e këtyre fëmijeve, mbi mbështetjen që ju duhet dhe nevojat që ato kanë.
