Kreu i Partisë Demokratike, Lulzim Basha ka pranuar marrëveshjen e 5 qershorit për hapjen e listave, por me kushtin që të mos preken koalicionet.
Basha zhvilloi një mbledhje me aleatët dhe pas përfundimit të saj deklaroi se është për hapjen 100% të listave, me kushtin që të mos preken koalicionet parazgjedhore dhe të mos ndryshojë formula e shpërndarjes së mandateve.
Deklarata e Bashës:
Marrëveshja e 5 Qershorit e cila më në fund u votua ditën e djeshme në Kuvend, është një bazë për garantimin e zgjedhjeve normale, nuk është ajo që deshëm ne. Opozita e Bashkuar është e vendosur të refuzojë çdo propozim unilateral për ndryshimet kushtetuese.
Duke qenë që PS dhe kryetari i saj kanë ndryshuar qëndrim disa herë, para dhe pas 5 qershorit, dhe tani mendojnë se po iu shesin shqiptarëve dashurinë për listat e hapura, dua t’ju njoftoj me vendimin e Opozitës së Bashkuar.
Kemi mandatuar sot Bylykbashin dhe Vasilin që përsa i përket kësaj çështje të paraqesin vendimin, që është:
Opozita e Bashkuar do të mbështesë 100 për qind hapjen e listave, me kushtin që të mos preken koalicionet, por të jenë siç janë sot, po kështu edhe formula e shpërndarjes së mandateve.