LIGJET E BIZNESIT
Ish-presidenti Bamir Topi ka komentuar së fundmi situatën politike në vend.
I pyetur nëse ka ndonjë plan për rikthimin në Partinë Demokratike, ai ka thënë se nuk ka patur deri më tani asgjë konkrete.
Denis Dyrnjaja: Lulzim Basha mendohet që është rivali i Ramës për kryeministër. Flitet për një hapje të Partisë Demokratike, ju kanë telefonuar, ju kanë thënë gjë që neve jemi të interesuar për t’iu kthyer si individ dhe figurë të rëndësishme e Partisë Demokratike. Keni pasur kontakte?
Bamir Topi: Jo, specifikisht telefonat jo, por ambienti natyrisht është sensibël. Si po pyesni ju pyesin edhe të tjerët.
Denis Dyrnjaja: Pra a po hapet Partia Demokratike realisht, është pyetja më ndryshe ndoshta që duhej bërë.
Bamir Topi: Nuk mund ta them sepse nuk jam afër. Por që në këndvështrimin tim, hapja do të hamendësonte vërtetë një transparencë absolute në nevojën për rotacion politik.
Të mendosh që është dikush që frenon rotacionin dhe duke dalë gjithmonë shpëtimtar i situatës, unë mendoj që është nevojë e një reflektimi dhe reagimi masiv.
Këtë i dashur Denis, qoftë edhe si intelektual, si qytetar, si politikan, si ish- kryetar shteti, absolutisht nuk mund ta pranoj.
Zëri im do të vijë duke u forcuar dhe jo në interes për asgjë. Në interes të nevojës që ky vend të ketë një demokraci të pranueshme dhe të ketë institucione.
Gjatë fjalës së tij ish-presidenti nuk i kurseu akuzat ndaj kryeministrit Edi Rama.
Ai tha se kryeministri e ka lënë vendin pa institucion, duke shtuar se çdo ditë në vend po instalohet termi i dhunës. Ndër të tjera ai tha se qytetarët e thjeshtë nuk ndihen të lirë të flasin, intelektualët gjithashtu po merren nëpërkëmbë…
“Ky njeriu këtu (drejton gishtin tregues në drejtim të portretit të kryeministrit Edi Rama) në mënyrë absolute e ka lënë Shqipërinë pa institucione.
Të lësh Shqipërinë pa institucione dhe të kesh kurajën të mbash ligjërata bombastike në parlament kjo është një tallje një fyerje për shqiptarët. Ata shqiptar që kanë preferuar që ta zgjedhin le ta mbajnë, Shqipëria nuk është e vetëm një pale.
Shqipëria është edhe e atyre që s’kanë parti politike. Shqipëria është edhe e intelektualëve që janë marrë nëpërkëmbë, që janë lënë atje në nivelin më të ulët të shoqërisë, sepse diçka tjetër flet sot.
Në një shtet që po instalohet çdo ditë jo me termin që kanë evropianët sot dhe bota e përparuar me elegancën, por me termin e dhunës, unë patjetër më vjen keq që shqiptarët ikin, por unë e justifikoj se përse ikin.
Ikin se së pari nuk ndihen mirë, nuk janë të lirë. Të diskutosh në vitin 2020 që ti nuk je i lirë dhe përfytyroni kush e ndien më shumë, e ndjejnë intelektualët. I ke parë që janë strukur.
Një vend që nuk i trajton intelektualët në mënyrë normale mos prit që kanë të ardhme. Të gjitha deklarimet që bëhen sot në parlament të krijojnë një kauze, unë besoj që ai që frenon rotacionin politik do të jetë patjetër shkaktar i mjaft problemeve, qoftë të karakterit politik, qoftë ato që prekin rendin kushtetues. Ky është rendi kudo në botë”, tha Topi për programin “Top Talk.”
