Shpërthimi i fuqishëm me të plagosur në Elbasan, arrestohet administratori i firmës private

Shpërthimi i fuqishëm me të plagosur në Elbasan, arrestohet administratori i firmës private

Një ditë pas shpërthimit të fuqishëm në Elbasan, ku u plagosën 3 punonjës si pasojë e rrjedhjes së gazit, policia ka vënë në pranga administratorin e firmës.

Mësohet se në përfundim të veprimeve hetimore, specialistët për Hetimin e Krimit në Komisariatin e Policisë Elbasan arrestuan në flagrancë, për veprën penale “Shkelja e rregullave të mbrojtjes në punë”, shtetasin: Y. P., 54 vjeç, banues në Elbasan, administratori i firmës.

Ngjarja e rëndë ndodhi në firmën Alba Gaz në ish-kombinatin metalurgjik Elbasan, në të cilin, gjatë kohës që po punonin në ambientet e firmës, nga shpërthimi i gazit u plagosën tre punonjës, të tre banues në Elbasan, të cilët janë jashtë rrezikut për jetën në spital.

Materialet hetimore i kaluan Prokurorisë pranë Gjykatës së Shkallës së Parë Elbasan, për veprimet e mëtejshme procedurale.