Zhvillime të forta/ Mblidhet nesër Këshilli Politik, ja çfarë do diskutojë Rama me opozitën

Priten zhvillime të forta politike në Shqipëri.

Kështu, pas rënies dakord midis mazhorancës dhe opozitës jashtëparlamentare për diskutimin e ndryshimeve kushtetuese, nesër do të zhvillohet mbledhja e Këshillit Politik.

Palët politike kryesore pranuan që të flasin rreth dy ndryshimeve të rëndësishme kushtetuese që fillimisht u inicuan nga opozita e re në parlament dhe një prej Partisë Socialiste.

Bëhet fjalë për hapjen e listave zgjedhore, kërkesë kjo e opozitës parlamentare që u la jashtë marrëveshjes së 5 qershorit për Reformën Zgjedhore.

Nga ana e tij kreu i qeverisë Edi Rama ra dakord për këtë, por shtoi dhe një kërkesë ku tha se koalicionet parazgjedhore duhet të hiqen.

Reagimi i të ashtuquajturës opozita e bashkuar, ishte i fortë, me pretendimin se këto ndryshime kushtetuese, të njëanshme sipas tyre, minojnë demokracinë në vend.

Por palët pranuan më në fund t’i diskutojnë në Këshillin Politik, ku ditën e nesërme në orën 11:00 do të marrë pjesë edhe kryeministri Edi Rama.

Përveç Oerd Bylykbashit nga PD, dhe Petrit Vasilit nga LSI, opozita jashtëparlamentare ka shtuar në listën e pjesëmarrësve edhe Gazment Bardhin.

Ndërsa në vend të Rudina Hajdarit, opozitën parlamentare do ta përfaqësojë Myslim Murrizi.