Në 5 të mëngjesit/ Nis nesër transporti publik, ja si do të veprohet me abonetë

Pas më shumë se tre muajve pushim, rinis nesër transporti publik në Tiranë.

Ky vendim është marrë pas një marrëveshje të arritur mes shoqatave të transportit publik me Bashkinë Tiranë dhe Ministrinë e Energjisë dhe Infrastrukturës.

Kështu, duke filluar nga nesër, autobuzët do të jenë në shërbim të njerëzve që nga ora 05.00 e mëngjesit.

Ndërsa përsa i përket aboneve, ato që janë blerë në muajin mars, nuk janë më të vlefshme.

Gjithashtu muaji korrik do të vazhdojë me bileta dhe shitja e aboneve do të nisë përsëri në gusht.

Procesi i udhëtimit do të shoqërohet me masat përkatëse të sigurisë.

Kondicioneri është i ndaluar të ndizet në autobus, ndërsa ajrimi duhet të jetë i vazhdueshëm përmes dritareve.

Maska është e domosdoshme për të përdorur transportin publik dhe një harresë apo mospërdorim i saj do të gjobitë pasagjerin.

Protokolli i sigurisë që do të zbatohet

Çdo përdorues i transportit publik qytetas/rrethqytetas është i detyruar të përdorë maska gjatë udhëtimit me autobus, si dhe këshillohen të mbajnë një distancë sigurie.

Në stacionet e qëndrimit udhëtarët janë të detyruar të përdorin maska gjatë pritjes së autobusit ndërsa personeli i transportit publik qytetas/rrethqytetas (shoferë, faturino, kontrollorë) do të jenë të detyruar të përdorin maska.

Për të maksimalizuar sigurinë ndaj COVID-19, edhe punonjësit e shërbimit të operatorëve si: kontrollor, dispecer, si dhe stafe të tjera plotësuese do të jenë të pajisur me maskë mbrojtëse në momentin që janë prezent në mjet gjatë kryerjes së shërbimit.

Ndërkaq, sikurse është rënë dakord mes Kryetarit të Bashkisë Erion Veliaj dhe Shoqatës së Shoqërive të Transportit Publik, mjetet e operimit do të dezinfektohen në mënyrë periodike në ambientet e operatorit transportues nga stafi i tij dhe mjetet e operimit në transportin qytetës/rrethqytetas për personelin e shërbimit (shoferë, faturino, kontrollorë) do të pajisen me dizinfektantë me bazë alkooli.

Gjatë udhëtimit duhet të bëhet e mundur ajrimi i ambienteve të brendshme të mjetit, përgjatë gjithë kohës së udhëtimit, nëpërmjet sistemeve të ajrimit të vendosura në pjesën e sipërme të mjetit ose duke mbajtur hapur pjesët strukturore të dritareve që e kanë këtë mundësi në rastet kur mjeti është i pajisur me dritare ose me sisteme ajrimi.

Në çdo mjet do të vendosen postera për respektimin e rregullave të higjienës, të rekomanduara nga OBSH-ja, të vendosura në vende të dukshme për udhëtarët.

Për zbatimin me rigorozitet të masave të sigurisë, çdo udhëtar dhe punonjës i transportit publik mban përgjegjësi personale për mosrespektimin e këtij protokolli, si dhe janë objekt kontrolli nga organet kompetente dhe masat e parashikuara në protokollin e sigurisë do të kontrollohen nga organet kompetente.