“Rama haxhoi 500 mln euro për fasada” Basha bën premtimin e madh: Shqipëria nuk do punojë më për 5 veta

Kryetari i Partisë Demokratike Lulzim Basha ka vizituar ditën e sotme Pogradecin.

Ai ka vendosur të takojë disa fermerë të zonës, të cilët kanë ngritur shqetësimin për rrënimin financiar që po kalojnë si shkak i pandemisë.

Basha theksoi se bujqësia në Pogradec po vuan pasojat e krizës së thellë ekonomike që ka prekur çdo qytetar, familje apo biznes në Shqipëri.

Të gjithë këtë situatë, kryedemokrati e cilëson si një braktisje të shtetit.

Basha shton se kryeministri Edi Rama ka harxhuar 700 milionë euro për fasada, miliona euro të tjera për PPP e tendera korruptive dhe 1.2 miliardë euro do të shkojnë për rrugën Milot-Fier.

“Ata paguajnë çmimin më të lartë të naftës në rajon dhe kanë 7 vite që nuk marrin subvencione për prodhimin e tyre. Ndërkohë që fermeri shqiptar është i zhytur në borxhe dhe krejt i vetëm në një treg të pabarabartë, fermeri kosovar dhe ai maqedonas përfiton çdo vit subvencione nga shteti dhe një sërë lehtësirash të tjera.

RAMAVIRUSI ka harxhuar 700 milionë euro për fasada, miliona euro të tjera për PPP dhe tendera korruptive, 1.2 miliardë euro do të shkojnë për rrugën fantazëm Milot-Fier, ndërsa fermerët, biznesi, qytetarët janë lënë në mëshirë të fatit.

Sot askush nuk pret më asgjë nga kjo qeveri. Në 7 vite ai ka dëshmuar se ka bërë të kundërten e asaj që ka premtuar, duke e zhytur vendin në krizën më të thellë të 20 viteve të fundit dhe shndërruar në vendin më të korruptuar të Europës dhe ndër më të korruptuarit e botës”, shkruan ai në rrjetet sociale.

Më tej, Basha paraqet edhe planin e opozitës kur të vijë në pushtet, që sipas tij sjell në qendër të vëmendjes infrastrukturën bujqësore dhe bizneset prodhuese.

“Ne kemi në planin tonë për bujqësinë, një fond prej 50 milionë eurosh në vit për të investuar në infrastrukturën bujqësore. Ne do t’u japim direkt, në dorë subvencione fermerëve në bazë të prodhimit të tyre. Fondi i parashikuar për subvencionet është së paku 100 milionë euro në vit. Këtë në fakt e bëjnë dhe sot fqinjët tanë, Kosova dhe Maqedonia.

Nuk do të bëjmë mrekulli. Ne do të krijojmë lehtësirat e nevojshme për biznese prodhuese, të cilat do t’i përpunojnë produktet tuaja që të mos kalben, por edhe do të hapin vende pune dhe këtu kam parasysh, fabrika të prodhimeve të konservuara, lëngjeve të frutave dhe nënprodukteve të tjera. Shqipëria nuk do të punojë më për 5 veta, por do të jetë vendi i shanseve dhe mundësive për të gjithë që duan të jetojnë dhe punojnë ndershmërisht”, shprehet ndër të tjera Basha.