LIGJET E BIZNESIT
Në konferencën e përjavshme për mediat, presidenti Ilir Meta ka komentuar situatën politike në vend dhe ‘lëmshin’ që është krijuar për Reformën Zgjedhore.
Kreu i Shtetit ka kërkuar që palët ti qëndrojnë marrëveshjes që vendi të shkojë sa më shpejt drejt zgjedhjeve.
“Uroj që palët t’i qëndrojnë marrëveshjes që kanë nënshkruar, e cila padyshim që mund të lerë mjaft për të dëshiruar në përmbajtjen e saj, por ne e dimë që jemi në një situatë kritike të një mosbesimi të thellë dhe të problemeve serioze të legjitimitetit të institucioneve.
Është koha për të kuptuar seriozisht të gjitha këto shqetësime që vijnë nga partnerët europianë të cilët kanë bërë përpjekjet më të mëdha për ta lënë derën të hapur për Shqipërinë, por në rast se dera do të mbyllet të gjithë shqiptarët do ta kenë të qartë se kush e ka përgjegjësinë.
Shpresoj të ketë reflektim të shpejtë dhe të ecim drejt zgjedhjeve të lira dhe të ndershme. Është e sigurt që zgjedhjet e ardhshme do të jenë nën një monitorim tepër të ashpër nga faktori ndërkombëtar”, u shpreh Meta.
Ndërkohë ai nuk ka ngurruar që të bëjë një krahasim të kryeministrit Edi Rama me ish-presidentin Ramiz Alia, përsa i përket deklaratave të përfaqësuesve të mazhorancës.
“Kur dëgjoj deklarata të tilla nuk më mbetet gjë tjetër veçse të kem pak nostalgji për ish-presidentin komunist Ramiz Alia i cili i shtyu zgjedhjet në vitin 1991 për t’i dhënë mundësi opozitës që të merrte pjesë në zgjedhje”, u shpreh Meta.
