Kryeministri Edi Rama i është përgjigjur ish-deputetes së PD-së, Jorida Tabaku, që e quajti gënjeshtar të paskrupullt.
Përmes një postimi në Twitter, Rama i kujton ish-deputetes se Eurobondi ishte një sukses dhe ajo që triumfoi është Shqipëria.
Ndër të tjera, Rama i thotë të përmbahet pasi fyerjet dhe akuzat nuk janë argumenta.
Postimi i kryeministrit Edi Rama:
Përmbahu zonja Tabaku, përmbahu sepse gjuha e akuzave dhe fyerjeve nuk është as argument, as shembull qytetarie në një shoqëri që ka nevojë për t’u pastruar në gjak e në mendje nga helmi i fjalëve të rënda, të cilat prej vitesh janë bërë buka dhe djathi i tregut të politikës…
Doni s’doni ju Eurobondi ishte një sukses kuptimplotë, përmbajtja e të cilit është pasqyrë e qartë e zbrazëtisë së propagandës politike-mediatike kundër qeverisë dhe në fakt, kundër vetë Shqipërisë që ju e tregoni përditë si ferrin mbi tokë! Shqipëria dje triumfoi, doni s’doni.