Xhaçka jep mesazhin e vyer krah vajzës: Në kohët e sotme nuk është e lehtë të ndërtosh…

Ministrja e Mbrojtjes, Olta Xhaçka ka përcjellë një mesazh të vlefshëm për të gjithë fëmijët.

Xhaçka ka postuar një video së bashku me vajzën e saj Hana, ku ka zgjedhur t’i lexojë një libër të novelistit britanik Roald Dahl “Gjigandi i madh i mirë”, duke sfiduar fëmijët të lexojnë sa më shumë në kuadër të nismës së krijuar nga Qendra Kombëtare e Librit dhe Leximit.

Postimi i Olta Xhaçkës:

Nisma e Qendrës Ndërkombëtare të Librit e Leximit, që qershori të jetë muaji i leximit për fëmijët është një lajm i mirë. Sepse sa më shumë t’i miqësojmë fëmijët tanë me librin, aq më shumë do të zhvillojmë dijet, ëndrrat dhe dëshirat e tyre në të ardhmen. Kjo është një nga arsyet pse unë zgjodha t’i rikthehem pas shumë vitesh një libri shumë të dashur në mbarë botën, “Gjigandi i madh i mirë”, por kësaj radhe për vajzën time Hana.

Kjo përzgjedhje nuk ishte e rastësishme, për më tepër që në kohët e sotme, nuk është e lehtë të ndërtosh marrëdhëniet e duhura të miqësisë e të besimit reciprok. Por tek “Gjigandi i madh i mirë”, një vajzë e vogël, me energjinë e madhe që ka brenda vetes për t’iu afruar diçkaje të panjohur e të çuditshme, na mëson se pasi ka larguar frikën, kurioziteti dhe dëshira e shtyjnë drejt një bashkëpunimi që sjell vetëm mirësi.

Qendra Kombëtare e Librit dhe Leximit synon që qershorin ta kthejë në muaj leximi për fëmijët.