Kryeministri Albin Kurti, në një intervistë me gazetaren Beti Njuma, ka folur edhe për marrëdhënien me kryeministrin Edi Rama.
Kurti tregoi se nuk i ka raportet e mira me kryeministrin Rama dhe ka qefmbetje ndaj tij, pasi ky i fundit i refuzoi propozimin për një mbledhje të përbashkët mes krerëve të dy shteteve në fillimin e pandemisë.
Ndër të tjera, Kurti u shpreh se të dy kryeministrat nuk kanë luksin ta injorojnë njeri-tjetrin.
Deklarata e Albin Kurtit:
Nuk kam shumë raporte me kryeministrin Rama pasi unë propozova të takohemi bashkë liderat nga Kosova dhe Shqipëria, thamë që ta bëjmë bashkë krerët e institucioneve, 6 veta të diskutojmë edhe për çështjen e luftimit të pandemisë Covid-19. Por edhe për hallet e njëri-tjetrit dhe hallet e përbashkëta që në fakt janë kryesoret, sepse kufiri nuk duhet të na ndante. Pra Kosova dhe Shqipëria e kanë një kufi që s’është i shqiptarëve. Mirëpo nuk pati gatishmëri dhe interesim për një takim të tillë. Ça të them tash. Unë jam i interesuar për bashkëpunim. Kryeministrat e Kosovës dhe Shqipërisë nuk e kanë luksin ta injorojnë kështu njëri-tjetrin.
