Presidenti Ilir Meta ka zhvilluar ditën e sotme një bashkëbisedim në video-konferencë me përfaqësuesit e Europa Nostra, zv.presidentin ekzekutiv Guy Clausse, Sekretaren e Përgjithshme Sneska Quaedvlieg-Michailovic dhe anëtarin e bordit Profesor Paolo Vitti.
Zyra e shtypit e Presidencës bën me dije se, Meta ka shprehur falenderimet e tij për Europa Nostra. Kjo për angazhimin që kanë treguar si dhe vëmendjen ndaj promovimit dhe ruajtjes së trashëgimisë kulturore dhe historike të vendit tonë.
Gjithashtu, Meta ka theksuar se shëmbja e paligjshme e Teatrit Kombëtar është çështje kushtetuese e trashëgimisë historike dhe identitetit kombëtar, tanimë edhe nje çështjë europiane.
Presidenti Meta ka rënë dakort me Europa Nostra për nisjen e një hetimi ndërkombëtar për shëmbjen e Teatrit dhe informimin e mëtejshëm të niveleve më të larta europiane.
Anëtari i bordit të Europa Nostra, Profesor Paolo Vitti është shprehur:
Europa nuk është vetëm euro, por edhe kulturë, solidaritet, humanizëm dhe identitet. Teatri Kombëtar ishte dëshmori i parë i Bulevardit ‘Dëshmorët e Kombit’, por demokracia dhe kultura europiane do fitojë.
Ndërkaq, Presidenti Meta është shprehur:
Nga sot më konsideroni edhe mua anëtarin më të ri të Europa Nostra.
