Deputetja Rudina Hajdari, e cila është njëkohësisht dhe përfaqësuesja e Opozitës së Re në Këshillin Politik që u mblodh sot paradite, ka folur me tone revolte për të gjithë pjesëmarrësit në mbledhje.
Menjëherë pas përfundimit të takimit në një prononcim të shkurtër përpara gazetarëve, Hajdari u shpreh se në këtë mbledhje i është bërë bisht Reformës Zgjedhore dhe është folur për deklaratat e kryeministrit Edi Rama dhe kryeetarit të PD Lulzim Basha.
Hajdari tha se askush nga politikanët nuk mendon për demokracinë e qytetarëve. Ajo shtoi më tej se do të arrijë që të krijojë liri dhe demokraci për popullin shqiptar, duke e cilësuar këtë gjë, si arsyeja kryesore, për të cilën u kthye në vendlindje.
“Qytetarët shqiptarë duhet të kuptojnë një gjë. Këshilli Politik nuk është një tryezë ku diskutohet se çfarë thanë kryetarët e Partive. Po diskutohen edhe mandatet. E dini pse ndodh kjo? Sepse kur mundohet të diskutohet për Reformën Zgjedhore, këta i bëjnë bisht dhe i shkelin syrin njëri-tjetrin. Këta nuk kanë asnjë lloj garancie në mënyrë që për shqiptarët të ketë një garë të ndershme mes shqiptarëve. Unë do vazhdoj betejën time për ndryshimin e vendit. Në këtë vend nuk ka liri dhe demokraci. Unë në Shqipëri erdha për të forcuar këto dy drejtime. U quajta tradhëtare kur shpreha mendimin tim në Parlament. Këtë betejë do ta çoj deri në fund. Le të më bashkohen të gjithë shqiptarët për të ndryshuar Sistemin Zgjedhor. Këta i kanë gjërat e tyre në rregull. Unë kam besimin që çdo demokrat real do më bashkohet në këtë betejë për të ndryshuar sistemin zgjedhor. Momenti është tani. Të gjithë ata që kanë humbur shpresën në këtë vend, duhet të luftojnë për këtë gjë”, deklaroi Hajdari gjatë fjalës së saj.