LIGJET E BIZNESIT
Çmimet e naftës ranë ndjeshëm, ndërsa bursat u rritën pas lajmit për marrëveshjen për një armëpushim dyjavor mes SHBA-së, Iranit dhe Izraelit, zhvillim që uli frikën e tregjeve për një përshkallëzim të mëtejshëm të konfliktit dhe për goditje ndaj furnizimeve globale të energjisë.
Tregjet reaguan menjëherë sapo u konfirmua marrëveshja dhe u hap perspektiva për rikthimin e qarkullimit në ngushticën e Hormuzit.
Në tregun e naftës, Brent ra nën 100 dollarë për fuçi, ndërsa nafta amerikane WTI pësoi gjithashtu rënie të fortë.
Reuters raportoi se Brent zbriti rreth 14.9% në 92.95 dollarë për fuçi, ndërsa WTI ra 16.1% në 94.79 dollarë, pasi tregjet hoqën një pjesë të primit të rrezikut që ishte krijuar nga frika për bllokimin e furnizimeve nga Lindja e Mesme.
Lehtësimi i tensioneve lidhet drejtpërdrejt me rëndësinë e ngushticës së Hormuzit, nga ku kalon rreth 20% e naftës botërore.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Sipas Reuters, vetëm perspektiva e rihapjes së kësaj rruge kyçe të tregtisë globale mjaftoi që investitorët të rivlerësonin rrezikun dhe të shtynin çmimet e energjisë poshtë.
Edhe bursat ndërkombëtare reaguan fuqishëm. Në Europë, indeksi pan-Europian STOXX 600 u rrit 3.6%, DAX-i gjerman 4.6% dhe FTSE 100 në Londër 2.3%, sipas Reuters.
Në Azi, Nikkei 225 u rrit 5.5%, ndërsa Kospi i Koresë së Jugut u ngjit 7.1%, teksa investitorët u kthyen te aksionet pas zbutjes së tensioneve gjeopolitike. Rritja në bursa u mbështet sidomos nga sektorët që përfitojnë nga energjia më e lirë.
Aksionet e kompanive të udhëtimeve, industrisë dhe bankave në Europë u rritën me 5% deri në 7%, ndërsa sektori energjetik ra 4.2% për shkak të rënies së çmimeve të naftës.
Megjithatë, lehtësimi mund të jetë i përkohshëm.
Reuters dhe AP theksojnë se marrëveshja është vetëm për dy javë dhe se tregjet mbeten të ndjeshme ndaj çdo shenje të re për tensione apo ndërprerje të furnizimit. Edhe pse reagimi i parë ishte pozitiv, pa një marrëveshje më të qëndrueshme politike, paqëndrueshmëria në tregjet e energjisë mund të rikthehet shpejt.
Për ekonominë globale, rënia e naftës është një sinjal pozitiv afatshkurtër, sepse ul presionet mbi inflacionin dhe kostot e energjisë për vendet importuese.
Por për sa kohë armëpushimi mbetet i brishtë, investitorët do të vazhdojnë të lëvizin mes lehtësimit të përkohshëm dhe frikës se kriza mund të rishfaqet sërish në çmimet e energjisë dhe në tregjet financiare. Burimet: Reuters, Associated Press.
