LIGJET E BIZNESIT
Shtrenjtimi i karburanteve si pasojë e luftës në Lindjen e Mesme mund të shkaktojë një krizë të re çmimesh tek produktet e tjera. Institucionet kanë rritur mbikëqyrjen e tregut, duke vendosur nën monitorim të paktën 80 produkte bazë ushqimore, në përpjekje për të parandaluar abuzimet me çmimet në kushtet e tensioneve gjeopolitike dhe efekteve zinxhir që ato po shkaktojnë në tregjet ndërkombëtare.
Në një konferencë për shtyp këtë të premte, Ministrja për Ekonominë dhe Inovacionin, Delina Ibrahimaj, tha se lista e produkteve është hartuar në bashkëpunim me Institutin e Statistikave dhe se monitorimi po kryhet në baza ditore nga Inspektorati i Mbikëqyrjes së Tregut.
“Sa i takon ushqimeve ne po i monitorojmë një shportë me 80 ushqime me bazë ditore dhe ka filluar të reflektohen në disa produkte të shportës çmime të rritura pikërisht për këtë arsye ne do të aktivizojmë disa grupe monitorimi nga ISHMT për të monitoruar realitetin e këtyre çmimeve.
Ne kemi zgjedhur në bashkëpunim me INSTAT një numër ushqimesh dhe një numër të limituar të tregtarëve dhe do të shohim çmimet dhe furnizimet për të parë realitetin e tyre. Nëse do të marrim vendime në të ardhmen do të lidhen me çmimet e shportëz bazë. Në 2022 ne ngritë m një bord për ushqimet dhe është e vështirë që i njëjti mekanizëm si tek karburantet të bëhet tek ushqimet.
Sepse nëse në karburante ka një bursë për të gjithë produktet e shportës kanë një shumëllojshmëri të importit. Megjithatë ne po monitorojmë është që të garantojmë mos ketë reflektime”, tha Ibrahimaj.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
E pyetur për çmimet e karburanteve dhe reagimin e qeverisë, Ibrahimaj tha se çmimi i naftës në vend ka qenë mesatarisht rreth 200 lekë për litër, ndërsa rritja në bursat ndërkombëtare nuk është reflektuar në të njëjtën masë në tregun vendas.
“Çmimi i bursës është rritur me 99.7 për qind. Nuk ka një pasqyrim direkt të të njëjtës vlerë dhe përmasë dhe në çmimet vendase. Mekanizmi që përdoret është një formulë ai i aktit normativ të vitit 2022 kur kishim një situatë të ngjashme që bazohet në çmimet bursës të një dite më parë dhe një llogaritje mbi kostot dhe duke shtuar një marzh 3 lekë për shumicën dhe 12 lekë për pakicën. Këto nuk janë marzhe fitimi por përballimi të shpenzimeve që kompanitë kanë.
Ne me bordin e transparencës do të jemi në monitorim të çmimeve. Në një situatë kur çmimet po rriten në mënyre të vazhdueshme të jemi transparente dhe mos lejojmë asnjë spekulim mbi konsumatorin.
Këtë po bëjë dhe për shportën e ushqimeve që kanë pasur disa luhatje gjatë ditëve të fundit dhe kemi nisur monitorimin ditor me INSTAT por do të nisim një mbikëqyrje më të thelluar me ISHMT që nga funksionet që ka është mbrojtja e konsumatorit. Efektet luftës të kenë sa më pak ndikim tek konsumatorët dhe që tregu po funksionon normalisht dhe pa abuzime nga situate”, tha Ibrahimaj.
Ministrja u ndal gjithashtu te performanca ekonomike e vendit, duke theksuar se ekonomia shqiptare u rrit me 3.8% gjatë vitit 2025, një normë mbi mesataren e Bashkimit Europian dhe vendeve të Ballkanit, duke reflektuar qëndrueshmëri pavarësisht presioneve të jashtme.
