Nisin punimet, 310 mln € për aksin Janinë-Kakavijë/ Nga Athina në kufirin shqiptar, për 4,5 orë

Kanë nisur zyrtarisht punimet për ndërtimin e aksit të ri rrugor Janinë-Kakavijë, një projekt I rëndësishëm ndërkufitar, i cili synon rritjen e sigurisë rrugore, uljen e kohës së udhëtimit dhe forcimin e lidhjeve mes Greqisë, Shqipërisë dhe vendeve të Ballkanit Perëndimor.

Në terren, kanë filluar punimet përgatitore, të cilat përfshijnë pastrimin e zonës nga bimësia, ndërhyrje dhe nivelim i terrenit me mjete të rënda, duke shënuar nisjen konkrete të ndërtimit të rrugës së re.

Kontrata për realizimin e projektit, me vlerë 310 milionë euro, është firmosur në dhjetor 2024. Sipas Sekretarit të Përgjithshëm të Infrastrukturës në Greqi, Dimitris Anagnopulos, aksi pritet të përfundojë brenda katër viteve. Aksi Janinë – Kakavijë, do të ketë gjatësi totale prej 70 kilometrash dhe do të jetë vazhdim i Autostradës Joniane, duke lidhur Janinën me pikën kufitare të Kakavijës. Ai konsiderohet boshti më perëndimor vertikal i Autostradës Egnatia, dhe është pjesë e rrjetit kryesor evropian të transportit (TEN-T).

Projekti ndahet në dy segmente: Janinë-Kalpak, 46.4 km me trase të re dhe 6 nyje pa kryqëzim në nivel dhe Kalpak – Kakavijë, 23.1 km, që përfshin modernizimin e rrugës ekzistuese deri në kufi.

Rruga është projektuar për shpejtësi 100 km/orë, me dy korsi për çdo drejtim dhe korsi emergjence. Gjerësia totale e autostradës do të jetë 22.25 metra, e pajisur me barriera sigurie dhe ndarje qendrore. Me përfundimin e këtij aksi, udhëtimi nga Athina deri në kufirin me Shqipërinë do të zgjasë rreth 4 orë e 30 minuta, nga 6 orë aktualisht, ndërsa në periudha me trafik të shtuar, koha mund të arrijë deri në 8-9 orë.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Rruga do të lidhë drejtpërdrejt Autostradën Joniane me Egnatian, do të lehtësojë trafikun rreth Janinës, si dhe do të përmirësojë aksesin drejt aeroportit të Janinës dhe zonës industriale të qytetit, si dhe do të krijojë lidhje më të shpejtë me portet e Igumenicës dhe Patrës.

Projekti, pritet të forcojë lidhjet ekonomike dhe lëvizjen ndërkufitare, duke përmirësuar ndjeshëm aksesin për rajone si Konica, Florina dhe Kastoria, si bashkëpunim mes Greqisë dhe Shqipërisë./Tv Scan