Zhvillimet nga turizmi, të huajt në hotele rritje me 55.4%

Turistët e huaj që kanë vizituar Shqipërinë këtë vit kanë zgjedhur kryesisht hotelet për të pushuar. Instituti i Statistikave konstaton se në muajin tetor, strukturat akomoduese shënuan një rritje të ndjeshme të vizitorëve dhe net qëndrimeve, krahasuar me të njëjtin muaj të vitit të kaluar.

“Vizitorët gjithsej u rritën me 39,1 %, ku ata jo-rezidentë shënuan një rritje prej 55,4 % dhe rezidentë 5,8 %. Net qëndrimet gjithsej u rritën me 17,4 %, ku ato jo-rezidentë u rritën me 26,0 %, ndërsa ato nga rezidentët u ulën me 3,1 %”, vlerëson INSTAT.

Sipas statistikave zyrtare, rritja më e madhe e vizitorëve jo-rezidentë u shënua në zonat bregdetare me 73.6 % dhe në hotelet dhe akomodimet e ngjashme 54.4 % rritje.

Vizitorët e huaj sipas vendit të rezidencës

Në tetor 2025, shumica e vizitorëve jo-rezidentë të cilët u akomoduan në strukturat pritëse në Shqipëri vijnë nga Kosova (14 %), Italia dhe Gjermania (sejcila me 13 %). Franca dhe Mbretëria e bashkuar kontribuan përkatësisht me 7 % dhe 5 % të vizitorëve, ndërsa 48 % e tyre ishin nga vende të tjera. Këto të dhëna reflektojnë prirjen e rritjes së turizmit hyrës nga tregjet kryesore të rajonit dhe Evropës. Norma e shfrytëzimit të dhomave në hotele arriti në 31,6 %, krahasuar me 27,7 % në tetor 2024.