LIGJET E BIZNESIT
Emigrantët shqiptarë po dërgojnë sasi të konsiderueshme parash pranë të afërmve në atdhe. Shifrat vlerësohen në mbi 1 miliard euro në vit (817 milionë euro për 9-mujorin e këtij viti, sipas Bankës së Shqipërisë), duke qenë një ndihmë e rëndësishme për familjet në vend. Por Instituti i Statistikave ka evindetuar në publikimin e fundit “Diaspora në shifra 2025” dy probleme. I pari, lidhet me faktin se këto para shkojnë kryesisht për ushqim dhe nevoja të tjera të përditshme, duke treguar indirejt për vështirësitë e familjeve shqiptare dhe problem I dytë lidhet me faktin se këto flukse valutore dërgohen në pjesën dërrmuese në rrugë informale.
“Pothuajse gjysma e migrantëve transferojnë një pjesë të të ardhurave të tyre në Shqipëri përmes remitancave. Vendimi për të dërguar remitanca është i lidhur pozitivisht me suksesin e emigrantëve në gjenerimin e të ardhurave dhe kursimeve jashtë vendit. Për më tepër, remitancat shpërndahen kryesisht për ushqim dhe nevoja të tjera.
Migrantët kanë tendencë të dërgojnë remitanca përmes kanaleve informale, kryesisht nëpërmjet miqve ose kur vizitojnë vetë Shqipërinë, ndërsa kanalet formale, siç janë bankat dhe operatorët e transferimit të parave përdoren si metodë kryesore në vetëm 30 përqind të rasteve”, vlerëson INSTAT.
Migrantët shqiptarë arrijnë përfitime të konsiderueshme në të ardhura gjatë përvojës së tyre të migrimit. Mesatarisht, migrantët fitojnë 2.5 herë më shumë sesa fitonin para migrimit dhe gati 2.5 herë më shumë sesa bashkëmoshatarët e tyre që qëndrojnë në Shqipëri.
Të ardhurat janë një ndër arsyet kryesore që I shtyjnë shqiptarët të emigrojnë. Të dhënat e INSTAT-it tregojnë se mbi 2.2 milionë shqiptarë jetojnë sot jashtë vendit. 70% e atyre që kanë emigruar në Europë janë të rinj, nën moshën 45 vjec, që konsiderohet edhe pjesa më produktive e tregut të punës.
