LIGJET E BIZNESIT
Banka e Shqipërisë mban të pandryshuar në 2.5 % normën bazë të interesit për lekun. Guvernatori i Bankës së Shqipërisë, Gent Sejko ka deklaruar në përfundim të mbledhjes së Këshillit Mbikëqyrës se ekonomia është në mjedis pozitiv, ndërkohë që inflacioni është ulur dhe është rritur punësimi.
“Informacioni i marrë në analizë sugjeron se ekonomia shqiptare ka vijuar të ndjekë një trajektore pozitive zhvillimi, gjatë gjysmës së dytë të vitit 2025. Kjo ecuri pasqyrohet në rritjen solide të aktivitetit ekonomik, mbajtjen e inflacionit nën kontroll, si dhe në konsolidimin e treguesve kryesorë të shëndetit ekonomik e financiar të vendit.
Politika monetare e ndjekur nga Banka e Shqipërisë ka pasur një rol esencial në këtë kontekst. Qëndrimi i saj konsistent me objektivin tonë të stabilitetit të çmimeve dhe fleksibiliteti operacional kanë kontribuuar në ankorimin e pritjeve për inflacionin dhe kanë gjeneruar kushte financiare të përshtatshme për rritjen e konsumit dhe të investimeve të familjeve dhe bizneseve”, ka deklaruar Sejko.
Guvernatori shtoi se parashikimet për të ardhmen mbeten pozitive. “Ekonomia pritet të rritet pranë potencialit të saj gjatë horizontit afatmesëm, ndërsa inflacioni pritet të kthehet në objektiv, gjatë tremujorit të dytë të vitit 2026”, u shpreh ai.
Në këto rrethana, Këshilli Mbikëqyrës i Bankës së Shqipërisë gjykoi se qëndrimi aktual i politikës monetare mbetet i përshtatshëm dhe e la në 2.5% normën bazë të interesit për lekun.
