Ambasadori Italian në Universitetin Mesdhetar, mbështje për integrimin e Shqipërisë

Universiteti Mesdhetar i Shqipërisë priti sot Ambasadorin e Italisë në Tiranë, Sh.T.Z. Marco Alberti, i cili zhvilloi një leksion të hapur me temë “Re-designing the Future: Accession of Albania to the EU”.

Gjatë fjalës së tij, Ambasador Alberti analizoi kontekstin global dhe sfidat e ndërvarësisë në Europën e sotme, duke theksuar se anëtarësimi i Shqipërisë në BE duhet parë si një riformësim natyror i hapësirës europiane dhe jo vetëm si një proces teknik zgjerimi.

Ai theksoi rëndësinë e reformave cilësore dhe rezultateve të matshme, si kusht i domosdoshëm për një proces të suksesshëm negociatash, duke rikujtuar se Italia mbetet një aleate strategjike e Shqipërisë, e angazhuar fuqimisht në mbështetjen e institucioneve, ekonomisë dhe shoqërisë shqiptare.

Presidenti i Universitetit Mesdhetar të Shqipërisë, Prof. Dr. Anastas Angjeli, përshëndeti leksionin dhe nënvizoi rolin historik të integrimit europian për vendin:

“Shqipëria është një vend europian në historinë, kulturën dhe aspiratat e saj. Integrimi në Bashkimin Europian është destinacioni ynë natyror kombëtar dhe vizioni për të cilin punojmë çdo ditë,” u shpreh Prof. Dr. Angjeli.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Duke iu referuar veçanërisht rolit të Italisë në këtë proces, ai shtoi:

“Italia është partneri ynë më i qëndrueshëm strategjik. Mbështetja italiane ka qenë e plotë, e sinqertë dhe e pandërprerë — jo vetëm në procesin e integrimit europian, por në çdo reformë të rëndësishme që ka transformuar Shqipërinë. Kjo miqësi është një aset kombëtar dhe një garanci për të ardhmen e vendit tonë,” deklaroi Prof. Dr. Angjeli.

Ai theksoi se Universiteti Mesdhetar i Shqipërisë ka një sërë marrëveshje bashkëpunimi me disa Universitete Italiane veçanerisht me Universitetin  e Tuscia’ (Viterbo) Itali, me të cilin ka bashkëpunimi për diploma të dyfishta ne ciklin master dhe doktoraturë dhe do të vijojë ta zgjerojë këtë bashkëpunim edhe në të  ardhmen.

Leksioni u ndoq nga student dhe  akademikë , duke vijuar  dialogun  e thelluar mbi të ardhmen europiane të Shqipërisë dhe partneritetin e saj të veçantë me Italinë.