LIGJET E BIZNESIT
Të vetëpunsuarve në Shqipëri, të ardhurat e të cilëve sigurohen nga më pak se 3 klientë, do tu ofrohet mundësia e deklarimit para drejtorisë tatimore rajonale me qëllim vërtetimin, nëse këto të ardhura burojnë vërtet nga marrëdhëniet e biznesit apo janë të ardhura, të cilat, në kushte normale, do të buronin nga marrëdhëniet e punësimit, por, me qëllim shmangien tatimore dhe uljen e detyrimeve tatimore, punonjësi ka dalë nga listëpagesa dhe është regjistruar si biznes.
Ministria e Financave ka hartuar një projektligj që sjell ndryshime në ligjin për tatimin mboi ardhurat, pasi gjatë zbatimit ne praktikë të këtij rregulli janë vërejtur ankesa nga personat fizike, që ushtrojnë aktivitet te mirëfillte biznesi, pavarësisht përqendrimit të të ardhurave te një apo dy klientë.
Referuar relacionit përkatës, në funksion të krijimit të një sistemi tatimor sa më të drejtë, me anë të këtij projektligji parashikohet përcaktimi i deklaratës se statusit të të vetëpunësuarit, ku listohen kritere shtesë, që, pavarësisht nëse personi fizik mund të ketë 80% të të ardhurave nga një klient i vetëm, apo 90% nga dy klientë, por në të njëjtën kohë personi fizik ushtron një marrëdhënie të mirëfilltë biznesi, atëherë personi fizik të mos penalizohet nga ky rregull antishmangie, por të bëhen vlerësime të mëtejshme lidhur me subjektet, të cilat janë realisht shmangës tatimor.
Kriteret që parashikohen në deklaratë lidhen kryesisht me: llojin e shërbimit dhe natyrën e marrëdhënies së punës; sjelljen e të vetëpunësuarit në ambientin e punës; kontrollin mbi produktin e punës dhe faktorët e gjenerimit të tij, të cilat do të vetëdeklarohen nga i vetëpunësuari në deklaratën e statusit të vetëpunësuarit.
Ndërkohë, në vijim të përpjekjeve për krijimin e një kuadri tatimor nxitës në fushën e sportit, artit dhe sponsorizimeve, projektligji parashikon gjithashtu shtimin e disa lehtësive fiskale, të cilat kanë për qëllim nxitjen e sponsorizimeve në këto fusha, si dhe krijimin e kushteve stimuluese për artistët e huaj, që zhvillojnë veprimtari në territorin e Republikës së Shqipërisë.
Në këtë kuadër, propozohet: zgjerimi i kategorisë së subjekteve, që përfitojnë nga njohja si shpenzim i zbritshëm në masën sa trefishi i shumës së sponsorizuar, ku shuma e sponsorizuar njihet deri në nivelin 5% të fitimit para tatimit. Kategoritë që do të përfshihen, përveç ekipeve sportive, do të përfshijnë edhe federatat sportive, komitet olimpike, si dhe sportistët e nivelit të lartë, që kanë fituar tituj për meritë në sport. Me qëllim nxitjen e tërheqjes së artistëve të huaj në vend, propozohet përjashtimi nga rezidenca tatimore për një periudhë prej 24 muajsh për artistët që nuk janë shtetas të Republikës së Shqipërisë.
Gjithashtu, me anë të këtij projektligji propozohet që nga 3% që janë aktualisht, shpenzimet e zbritshme lidhur me aktivitetet e kërkimit dhe zhvillimit, që synojnë përfitimin e njohurive të reja në fushën e shkencës dhe teknologjisë, si dhe zbatimin e tyre përmes inovacionit në produkte apo shërbime, të njihen deri në 5% të fitimit para tatimit. Ky propozim synon të nxisë sektorin privat për të investuar në kërkim dhe zhvillim (R&D) përmes bashkëpunimit me institucione shkencore dhe organizata kërkimore, duke e bërë më tërheqëse sponsorizimin në këtë fushë.
