LIGJET E BIZNESIT
Kompanitë europiane po i lënë pas disa prej pasigurive, që dominuan pjesën më të madhe të vitit 2025 dhe po e drejtojnë vëmendjen drejt një viti të ardhshëm që duket dukshëm më i favorshëm.
Përmendjet e fjalës “pasiguri” në konferencat e fitimeve të kompanive europiane ranë nën mesataren pesëvjeçare gjatë sezonit të raportimeve të tremujorit të tretë dhe ndodhen në nivelin më të ulët të këtij viti, pas kulmit të arritur në tremujorin e dytë.
Firmat europiane kryesisht sfiduan pritshmëritë e zymta për fitimet e tremujorit të tretë, duke dhënë më shumë përmirësime të projeksioneve sesa ulje. Ato gjithashtu përballuan tarifat dhe luhatjet e monedhave, duke raportuar marzhe më të forta se sa pritej.
Kjo përkoi me politika më të qarta tregtare, të cilat u mundësuan kompanive të ishin më të sigurta për koston dhe ecurinë e fitimeve në muajt në vijim.
Qartësi tregtare
Referencat ndaj tarifave në konferencat e fitimeve ranë gjithashtu krahasuar me tremujorin e parë dhe të dytë, sipas një analize të Bloomberg Intelligence. “Toni i përgjithshëm është bërë më pozitiv, me diskutime për zinxhirët e furnizimit, inflacionin dhe rimëkëmbjen që janë gjithnjë e më optimiste,” shkruajnë strategët e BI, Kaidi Meng dhe Laurent Douillet.
Gjatë verës, SHBA-ja dhe Bashkimi Europian arritën një marrëveshje tregtare për një normë tarifore 15%, ndërsa kompani si Merck KGaA kanë negociuar gjithashtu marrëveshje të veçanta me administratën amerikane. Zvicra, ekonomia e zhvilluar që u godit nga tarifat më të larta, sapo ka arritur një marrëveshje paraprake me Donald Trump për të ulur normën ndëshkuese nga 39% në 15%.
Disa sektorë ende po vuajnë nga tensionet tregtare. Hexpol AB, një prodhues komponentësh gome dhe plastike për industrinë automobilistike dhe atë të ndërtimit, pati numrin më të lartë të përmendjeve të fjalës “pasiguri” në gjithë indeksin Stoxx 600 Europe.
“Pasiguria e lartë vazhdon, e nxitur nga tarifat amerikane dhe politika tregtare e SHBA-së, dhe kjo po na ndikon indirekt,” tha drejtori ekzekutiv, Klas Dahlberg, duke shpjeguar se tarifat kishin dëmtuar klientët në Amerikën e Veriut dhe kishin frenuar kërkesën.
Prodhuesi suedez i kamionëve Volvo AB, konferenca e fitimeve e të cilit ishte po ashtu e mbushur me përmendje të pasigurisë, pret dobësi në Amerikën e Veriut edhe vitin e ardhshëm, pasi porositë po bien për shkak të aktivitetit të reduktuar të transportit dhe tarifave 25% mbi kamionët e mesëm dhe ata të tonazhit të rëndë, që hynë në fuqi në fillim të këtij muaji.
Dobësia tani është e përqendruar, dhe jo e shpërndarë në të gjithë sektorët, gjë që po rrit besimin për një rimëkëmbje vitin e ardhshëm. Kjo, nga ana tjetër, ka nxitur rritjen e vlerësimeve për vitin 2026, me pritshmëritë që janë rritur sërish që nga fillimi i sezonit të fitimeve të tremujorit të tretë.
Megjithëse disa sektorë si ai automobilistik dhe kimik mbeten ende në një situatë të vështirë, “qëndrueshmëria e gjerë e marzheve si në industritë ciklike, ashtu edhe në ato mbrojtëse, ofron një bazë më të fortë për fitimet teksa i afrohemi vitit 2026,” thanë Meng dhe Douillet. / Bloomberg
